Fjarðabyggð tekur upp rafrænar undirskriftir
Bæjarstjórn Fjarðabyggðar samþykkti á fundi sínum í gær að fundargerðir allra nefnda og bæjarstjórnar sveitarfélagsins yrðu undirritaðar með rafrænum hætti.Fjallað er um málið á vefsíðu Fjarðabyggðar. Þar kemur fram að síðustu mánuði hefur verið unnið að því að efla rafræna stjórnsýslu sveitarfélagsins.
„Samhliða þessu geta íbúar nú undirritað skjöl og umsóknir sveitarfélagsins með rafrænum skilríkjum í gegnum íbúagátt sveitarfélagsins. Stuðst er við lausnir frá fyrirtækinu One Systems og með uppfærslu kerfisins voru rafrænar undirritanir innleiddar auk annarra nýjunga í skjalakerfi sveitarfélagsins.“ segir á vefsíðunni.
„Eftir að bæjarstjórn hafði staðfest nýja framkvæmd undirritana og lokið fundi í gær undirrituðu bæjarfulltrúar fyrstu fundargerð sveitarfélagsins með rafrænum skilríkjum sem gekk greiðlega fyrir sig.“
Mynd: fjarðabyggð.is