Fimm í einangrun eystra eftir landamærasmit
Fimm einstaklingar eru í einangrun á Austurlandi eftir að hafa greinst með Covid-19 veiruna. Þeir greindust við komu Norrænu til Seyðisfjarðar á þriðjudag.Um borð í ferjunni var 25 manna hópur á leið til vinnu hér á landi. Tveir þeirra greindust með smit við skimun í Hirtshals í Danmörku og voru þeir einangraðir í ferjunni.
Við komuna var sýni tekið úr þeim og reyndist annar þeirra með gamalt smit. Hann er því laus ferða sinna en félagi hans er í einangrun.
Að auki reyndust fjórir úr hópnum til viðbótar smitaðir, samkvæmt upplýsingum frá lögreglunni á Austurlandi. Þeir eru í einangrun og aðrir úr hópnum í sóttkví. Ekki er talin hætta á að veiran geti breiðst út frá hópnum.
Enn eru tíu skipverjar á súrálsskipinu Taurus Confidence veikir og í einangrun um borð. Líðan þeirra hefur ekki breyst síðustu daga en vel er fylgst með þeim.
