Baðhús Óbyggðasetursins brann - Myndir
Slökkviliðið á Egilsstöðum var kallað úr skömmu fyrir klukkan þrjú í dag að bænum Egilsstöðum í Fljótsdal. Þar var eldur laus í baðhúsi Óbyggðaseturs Íslands og skíðlogaði í húsinu er slökkviðið kom að.„Við erum búnir að ná tökum á þessum bruni og erum núna að slökkva í glæðum og ganga frá,“ segir Haraldur Geir Eðvaldsson, slökkviliðsstjóri Brunavarna á Austurlandi, en hann var staddur á vettvangi þegar Austurfrétt náði tali af honum.
„Þetta var töluverður eldur þegar við komum en við náðum fljótt tökum á honum þannig að ekki var hætta á að eldurinn breiddist út,“ segir Haraldur Geir.
Aðspurður um hvort tjónið sé mikið segir Haraldur erfitt að meta það. Það sé hinsvegar ljóst að töluvert þarf að gera ef koma á baðhúsinu í fyrra horf.
Ekki er vitað um eldsupptök að svo stöddu. Húsið var mannlaust er eldurinn kom upp.