Ekki talin hætta í byggð þótt hreyfing mælist í skriðusárinu
Hreyfingar hefur orðið vart ofarlega í sári stóru skriðunnar sem féll á Seyðisfjörð 18. desember síðastliðinn. Ekki er talin hætta í byggð en varað er við ferðum fótgangandi í hlíðinni undir skriðunni.Í tilkynningu almannavarna kemur fram að hreyfingar hafi orðið vart á einum af þeim speglum sem notaðir eru til að mæla hreyfingu við upptök skriðunnar. Spegillinn er skammt ofan við innanverð skriðuupptökin.
Þar er bent á að hrun úr bröttu brotstáli stóru skriðunnar á næstu mánuðum þurfi ekki að koma á óvart, það sé hluti af því að jarðlögin leiti jafnvægis á ný eftir hamfarirnar. Hreyfingin nú er talin hluti af því.
Ekki er talin hætta í byggð en sérstakrar varúðar verður gætt við vinnu á skriðusvæðinu. Nýir varnargarðar á svæðinu eru taldir draga úr hættu á að frekari skriðuföll úr upptökum stóru skriðunnar skapi hættu í byggðinni. Rétt þykir að vara við ferðum gangandi í hlíðinni undir upptökum stóru skriðunnar.
Rauntímavöktun Veðurstofu er á mælum í hlíðinni ofan Seyðisfjarðar.
