Byrja að sá grasfræjum í aurskriðusárin á Seyðisfirði
Í næstu viku verður byrjað að sá grasfræjum í aurskriðusárin á Seyðisfirði. Gert er ráð fyrir að verkið taki um tvær til þrjár vikur.
"Við erum búin að kaupa um 500 kíló af fræi og stefnum á að sá í 10 ha , fyrsta kastið, Mögulega verður einhver aukning á þessu," segir Jón Egill Sveinsson verkefnisstjóri með hreinsunarstarfi Seyðisfirði.
"Sáning verður á hendi heimamanna á Seyðisfirði og geri ég ráð fyrir að 4-6 verði við þetta í tvær til þrjár vikur. Tími sem fer í þetta getur verið nokkuð breytilegur m.a. vegna veðurs. Sami starfskraftur mun svo hafa umsjón með að endursá í svæði gerist þess þörf síðar í sumar."
Þá segir Jón að fræi og áburði verður keyrt upp í hlíðar eins og hægt er með sexhjóli en sáð verður með höndum, þar sem víðast er illmögulegt að koma tækjum að.
