Börkur með 1100 tonn, hrognafyllingin komin í 17%
Börkur NK kom til Neskaupstaðar í morgun með 1100 tonn af loðnu. Hrognafyllingin var 17% í þessari loðnu sem telja verður mjög gott. Eins og kunnugt er af fréttum er lágmarkskrafan 13% fyrir japönsku kaupendurnar.Á vefsíðu Síldarinnslunnar segir að byrjað var að vinna úr aflanum um hádegi en þá var lokið við að vinna 900 tonn sem Beitir NK kom með í gær.
„Við fengum aflann í fjórum köstum í Meðallandsbugtinni. Tókum þrjú köst í gær og eitt 200 tonna kast á mánudagskvöld. Þetta er fínasta loðna; hrygnuhlutfall er gott, 17% hrognafylling og átan einungis 0,3. Þetta hlýtur að vera gott í Japanann,“ segir Hjörvar Hjálmarsson skipstjóri á Berki í spjalli á vefsíðunni um túrinn.
„Það var ekki mikið að sjá af loðnu þarna í bugtinni í gær. Það var mun meira að sjá á mánudaginn. En þarna eru öll skipin að berja á þessu. Ég tel að þetta sé alls ekki fremsti hluti loðnugöngunnar og það eigi eftir að gjósa upp loðna í Háfadýpinu eða við Eyjar á næstu dögum. Annars er loðna mjög víða, meðal annars hérna fyrir austan,“ segir Hjörvar.
Mynd: Hugi Freyr Ólason.
