Beitir og Börkur í samstarfi á loðnumiðunum
Síldarvinnsluskipin Beitir og Börkur eru komin á loðnumiðin. Samkomulag hefur verið gert við áhafnir skipana um samstarf við veiðarnar þannig að loðnan komi sem ferskust í land.Þetta kemur fram á heimasíðu Síldarvinnslunnar. Þar segir að skipin héldu til loðnuveiða í gær. Veðrið hefur verið heldur óhagstætt á miðunum en í morgun hafði það heldur gengið niður.
„Við erum á Meðallandsbugtinni og það er víða eitthvað að sjá. Við erum að skoða þetta núna,“ segir Tómas Kárason skipstjóri á Beiti í samtali við vefsíðuna.
„Hér er heldur leiðinleg sunnanátt en það er vel hægt að kasta þannig að veðrið háir okkur ekki.“
Hvað fyrrgreint samkomulag varðar segir að það felst í því að skipin skipuleggi veiðarnar þannig að þau skiptist á að koma með sem ferskastan afla að landi hverju sinni til að tryggja sem mest gæði framleiðslunnar.
„Þess vegna er gert ráð fyrir að afla verði dælt á milli skipanna á miðunum ef á þarf að halda. Áhafnirnar munu síðan skipta aflaverðmætunum á milli sín. Samstarf sem þetta hefur ekki verið reynt við loðnuveiðar áður en það gafst vel hjá Síldarvinnsluskipunum á makrílvertíðinni sl. sumar,“ að því er segir á vefsíðunni.
