Austfirskir listamenn á List í ljósi
Aðeins austfirskir listamenn eiga verk á listahátíðinni List í ljósi, sem hefst á Seyðisfirði í kvöld. Skipuleggjandi hátíðarinnar segir að meiri nánd muni ríkja á henni en áður.„Þetta verður náin heimahátíð. Það eru bara listamenn og menningarstofnanir héðan frá Seyðisfirði og nágrenni sem taka þátt.
Það verður heldur ekki genginn hringur í bænum heldur verður Austurvegurinn sýningarleiðin, frá Herðubreið að Skaftfelli. Á þessari leið verða þó nokkur verk.
En það verður meiri nánd á hátíðinni heldur en verið hefur,“ segir Sesselja Hlín Jónasardóttir, einn skipuleggjenda hátíðarinnar.
Dagskrá hátíðarinnar hófst reyndar í gær með frumsýningu heimildarmyndar um starfsemina sem var áður í húsunum sem Tækniminjasafn Austurlands hefur starfað í síðustu ár. Tekin voru viðtöl við fólk sem starfaði í húsunum. Samhliða List í ljósi verður líka haldin kvikmyndahátíð með 56 myndum og myndskeiðum frá sjálfstæði kvikmyndagerðarfólki um allan heim.
Kveikt verður á listaverkunum í kvöld klukkan 18:00 og verða þau í gangi til 22:00. Í fyrra setti bylur strik í dagskrána og um helgina er spáð hvassviðri og úrkomu. „Það er spáð rigningu á laugardag og þá eigum við að sleppa. Við höfum líka lært og fært tækin sem varpa frá sér verkunum inn í hús,“ segir Sesselja.
Eins verður í kvöld opnað útigallerí sem sett hefur verið upp á Seyðisfirði í samvinnu Listar í ljós og LungA skólans. Gert er ráð fyrir að það standi til framtíðar og verði til staðar fyrir listastofnanir á Austurlandi.
Þá hefur verið prentuð út verk eftir þá listamenn sem sýna á hátíðinni í ár og verða þau borin út sem listagjöf til Seyðfirðinga yfir helgina.