Afkoma Fjarðabyggðar jákvæð um 211 milljónir
Á heildina litið er rekstrarafkoma Fjarðabyggðar góð miðað við árferði á síðasta ári. Afkoma ársins hjá samstæðu A og B hluta var jákvæð um 211 milljónir kr. en þar af var afkoma A hluta jákvæð um 52 milljónir kr.Þetta kemur fram í ársreikningi Fjarðabyggðar fyrir árið 2020. Fyrri umræða um ársreikninginn fór fram í bæjarstjórn fyrir helgi og sú seinni er áformuð 15. apríl n.k.
„Í ársreikningi Fjarðabyggðar 2020 kemur styrkur sveitarfélagsins vel fram þrátt fyrir COVID-19 faraldurinn,“ segir í umfjöllun um reikninginn á vefsíðu Fjarðabyggðar.
„Fjarðabyggð tók meðvitaða ákvörðun um að auka rekstrarútgjöld og fjárfestingar til að bregðast við þeirri kreppu sem við blasti í kjölfar heimsfaraldursins m.a. með aukningu rekstrarútgjalda í formi tímabundina ráðninga og annars rekstrarkostnaðar en aukning frá upphaflegri fjárhagsáætlun nam um 200 milljónir kr. auk þess sem fjárfestingar voru auknar um 821 milljónir kr. frá upphaflegri fjárfestingaráætlun á árinu 2020.“
Þá segir að Fjarðabyggð byggi á sterkum tekjugrunni og sterkum atvinnugreinum í sjávarútvegi, áliðnaði og þjónustugreinum.
„Niðurstaða ársreiknings gefur fyrirheit um áframhaldandi kraftmikið samfélag til framtíðar líkt og áður,“ segir á vefsíðunni.
Rekstrartekjur, samstæðu A og B hluta sveitarfélagsins, námu samtals 8.706 milljónum kr. en þar af námu rekstrartekjur A hluta 6.072 milljónum kr. Til samanburðar voru rekstrartekjur samstæðu 8.471 milljónir kr. árið 2019. Rekstrartekjur samstæðu hækkuðu því um 2,8% á milli ára.
Rekstrargjöld, án afskrifta, í samstæðu A og B hluta námu 7.373 milljónum kr. og þar af voru rekstrargjöld A hluta 5.948 milljónir kr.
Handbært fé hækkaði á árinu um 48 milljónir kr. og nam 180 milljónum kr. í árslok 2020.
Eignir sveitarfélagsins voru í lok árs 2020 samtals 16 milljörðum kr., þar af námu fastafjármunir tæpum 15 milljörðum kr.
Heildarskuldir og skuldbindingar námu um 10 milljörðum kr. og hækkuðu á milli ára um 333 milljónir kr.
