Á þriðja tug tilkynninga um tjón eftir skriðurnar á Seyðisfirði
Náttúruhamfaratryggingum Íslands hafa þegar borist á þriðja tug tilkynninga um tjón eftir skriðuföllin á Seyðisfirði í síðustu viku. Máli skiptir að tilkynna tjón sem fyrst.Starfsfólk stofnunarinnar kom austur í gær til að veita upplýsingar og leiðbeiningar um hvernig staðið verður að úrvinnslu tjóna eftir skriðurnar.
Í tilkynningu frá stofnunni segir að miklu máli skipti að öll tjón séu tilkynnt sem fyrst svo að hægt sé að meta tjón og greina umfang þeirra. Í dag höfðu hátt í 30 tjón verið tilkynnt.
Til að geta miðlað upplýsingum sem best hefur NTÍ útbúið sérstakt kynningarefni fyrir Seyðisfjörð á þremur tungumálum: pólsku, ensku og íslensku. Þar er farið yfir á hvaða forsendum vátryggingar NTÍ eru byggðar, hvernig standa skuli að tilkynningum um tjón og við hverju megi búast eftir að tilkynning hefur verið send inn.
Bæklingarnir eru allir aðgengilegir hér á vef: https://www.nti.is/frettasafn/upplysingar-til-tjonthola-a-seydisfirdi/