65.000 rúmmetrar af efni komu niður
Áætlað er að 65.000 rúmmetrar af efni hafi runnið úr hlíðinni utan við Búðará í stóru skriðunni sem féll á Seyðisfjörð þann 18. desember síðastliðinn.Þetta kom fram hjá Tómasi Jóhannessyni, fagstjóra ofanflóðadeildar Veðurstofu Íslands, á íbúafundi í dag. Sérfræðingar Veðurstofunnar hafa frá því skriðan féll safnað um hana gögnum og reiknað út umfanghennar.
Upptök skriðunnar eru í 170 metra hæð í Botnabrún. Skriðan er um 435 metra löng frá efsta brotsári og út í sjó.
Skriðan greinist í tvennt og er innri armur hennar, sem staðnæmdist við Hafnargötu, um 130 metrar á breidd, en sá ytri sem féll alla leið út í sjó, um 190 metrar.
Meginupptakasvæði skriðunnar er um 70 metrar á breidd og 60 metra langt í stefnu skriðunnar. Flekinn, sem fór af stað, var 15-17 metrar þar sem hann var þykkastur.
Út frá þessu má áætla að efnið sem fór af stað hafi verið um 65 þúsund rúmmetrar eða því sem samsvarar 5-6000 fulllestuðum vörubílum.
