Körfubolti: Bleikir Hattarar burstuðu ÍA – Myndir
Höttur er nú eina ósigraða liðið í fyrstu deild karla í körfuknattleik, en liðið vann ÍA með 40 stiga mun á Egilsstöðum á föstudagskvöld. Ágóði af leiknum og bleikum búningum heimaliðsins renna til fjölskyldu konu sem nýverið lést úr krabbameini.Viðbúið var að á brattann yrði að sækja fyrir ÍA sem hafði fyrir leikinn tapað öllum sínum viðureignum. Það kom fljótt á daginn.
Í hvert sinn sem Höttur náði að keyra upp hraðann í leiknum dró duglega í sundur með liðunum og var Höttur 29-13 yfir eftir fyrsta leikhluta. Í öðrum leikhluta var leikur Hattar hægari meðan Skagaliðinu tókst að spila á sínum styrkleikum, stórum mönnum inni í teig og varð munurinn minnstur 45-40. Höttur skoraði þó síðustu tólf stig hálfleiksins.
Í seinni hálfleik yfirkeyrði Höttur gestina og urðu lokatölurnar 114-74. Ekki auðveldar stöðu ÍA að Davíð Magnússon sína aðra tæknivillu fyrir tuð og þar með bann í næsta leik.
Tim Guers var stigahæstur hjá Hetti með 25 stig en Spánverjararnir David Guardia og Juan Luis tóku báðir 11 fráköst. David skoraði að auki 16 stig og Juan Luis 11.
Höttur, Sindri og Haukar hafa öll unnið fimm leiki en Höttur er hefur leikið einum leik færra.
Höttur lék í bleikum búningum í tilefni af bleikum október. Búningarnir voru boðnir upp á meðan leik stóð og seldust allir. Ágóði af leiknum rennur til fjölskyldu Birnu Bjarkar Reynisdóttur kennara á Egilsstöðum, en hún lést nýverið eftir baráttu við krabbamein.
Þá tók körfuknattleiksdeildin í hálfleik á móti vél sem sendir boltann í hendur leikmanna á skotæfingum. Vélin var gefin af MVA og vígði framkvæmdastjóri fyrirtækisins, Stefán Vignisson, hana. Eftir leik fengu síðan yngri iðkendur og aðrir áhugasamir að prófa hana.
Höttur féll hins vegar úr leik í bikarkeppninni í gærkvöldi fyrir öllu erfiðri andstæðing, úrvalsdeildarliði Grindavíkur á útivelli. Hetti vegnaði vel í byrjun og var yfir eftir fyrsta leikhluta, 23-24 en staðan í hálfleik var 43-41.
Snemma í þriðja leikhluta náði heimaliðið tíu stiga forskoti sem það gaf aldrei eftir. Eftir þann leikhluta var staðan 68-59 og lokatölurnar 86-74.
Guers var aftur stigahæstur, að þessu sinni með 28 stig og Arturo Fernandez með 20.
