Kiwanisfólk leikur lengstu golfholu landsins: Hugmyndin kom í draumi

isgolf_kiwanis.jpg
Kylfingar úr Kiwanis-hreyfingunni leika nú lengstu golfholu landsins sem liggur hringinn í kringum landið. Markmiðið er að vekja athygli á hreyfingunni og safna fé til styrktar góðum málefnum. Forsprakki hópsins segir hugmyndina hafa komið til sín í draumi.

„Ég hafði verið að hugsa um hvernig hægt væri að auglýsa Kiwanis og gera góða hluti í leiðinni og þá kom þessi hugmynd til mín eiginlega í draumi,“ segir Guðlaugur Kristjánsson.

„Ég vildi spila í gegnum bæjarfélögin og það var auðvelt í draumnum því við skutum bara á milli garða. Það má hins vegar ekki. Við mótuðum hugmyndina og fengum nauðsynleg leyfi.“

Austfjarðaþokan tafði

Ferðin hófst 18. júní og gert er ráð fyrir að hópurinn komi til Reykjavíkur á mánudag. Leikið var um Austfirði um helgina þar sem hópurinn hreppti bæði glampandi sól og hina frægu Austfjarðaþoku. „Við sáum stundum ekki á milli stikna á veginum og þurftum því að slá styttri högg.“

Að meðaltali eru slegnir um 150 metrar í hverju höggi og leiknir um 100 kílómetrar á dag. Litið er á hringveginn sem eina golfbraut með parinu 9999 höggum. Ferðin hefur samt gengið vel og vonast er til að hópurinn leiki undir pari.

Kylfingarnir eru 5-6 en 22 alls í hópnum. Þrír þáttagerðarmenn frá Skjágolfi eru með en stöðin sýnir tvo þætti um ferðina í haust. Aðrir sinna ýmsum hlutverkum en mikil áhersla er lögð á öryggismálin.

„Við erum með öryggisbíla á sitt hvorum enda, sérstaka fána sem við biðjum fólk um að virða og tvö hundruð metra aukasvæði þannig að engir bílar skemmist þótt kúlan fari á veginn.“

Nota tækifærið til að tína rusl

Þá leggur hópurinn áherslu á að bera virðingu fyrir náttúrunni. Skotið er af sérstökum mottum á viðkvæmum svæðum til að skaða þau ekki. Tækifærið hefur líka verið nýtt til að tína upp rusl í vegköntum.

„Ég hef veitt athygli miklu magni af haglaskotum. Við erum búin að taka upp yfir 70 skotum, í vegköntum þar sem virðist skotið úr bílum. Við týnum upp það rusl sem við sjáum, við notum tækifærið fyrst við erum hvort sem er úti í móa.“

Hinar ýmsu dýrategundir hafa einnig sýnt óvæntan golfáhuga. „Það er rétt við Höfn sem einn heyrir kurr, horfir í kringum sig og sér þá rjúpu í fetsfjarlægð. Hann þorði ekki að slá og þurfti að ýta henni frá. Á sama tíma kom önnur. Þær voru ekki hræddar, þær komu svo nálægt að hann hefði getað klappað þeim. Síðan höfum við fengið rollur upp á veginn sem neita að hreyfa sig og við þurft að bíða eftir þeim.“

Safnað er áheitum í ferðina. Helmingur ágóðans rennur til baráttunnar gegn stífkrampa í samstarfi við UNICEF, barnahjálp Sameinuðu þjóðanna. Hinn helmingurinn fer í að laga til á sambýlum landsins. Nánari upplýsingar um ferðina má finna á www.isgolf.is.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.