Fótbolti: Vona að við verðum bara tveimur stigum frá Leikni eftir leik
Fjarðabyggð hefur leikið þrjá leiki í röð og náð þar tveimur sigrum í annarri deild karla í knattspyrnu. Það hefur skilað liðinu upp í fimmta sæti deildarinnar. Í kvöld mætir það toppliði Leiknis í Austfjarðaslag.„Við hlökkum til að mæta til leiks. Bæði lið hafa byrjað sumarið vel og þetta verður vonandi góður leikur,“ segir Dragan Stojanovic, þjálfari Fjarðabyggðar.
Í lið Fjarðabyggðar vantar í kvöld Marínó Mána Atlason, sem er meiddur og Hákon Þór Sófusson sem er nýkominn aftur til félagsins er ekki heldur tiltækur. Aðrir eru klárir í slaginn, þeirra á meðal varnartengilliðurinn Júlíus Óli Stefánsson sem kom frá Selfossi í byrjun mánaðarins og leikur með Fjarðabyggð í mánuð.
Leiknir hefur farið vel af stað í sumar og er í efsta sæti deildarinnar eftir 10 umferðir með 21 stig en Fjarðabyggð er í því fimmta með sextán. Eftir leikinn í kvöld er Íslandsmótið hálfnað.
„Það segir sig sjálft að Leiknisliðið er mjög sterkt fyrst það er í efsta sæti. Það er með sterka útlendinga og fimm stigum meira en við. Ég vona þó að eftir kvöldið verðum við bara tveimur stigum á eftir þeim. Við munum gera allt til þess.“
Ég tel okkur vera með gott lið. Blandan í hópnum milli ungra og efnilegra leikmanna sem fengið hafa tækifæri í sumar og flottra erlendra leikmanna er góð. Það hefur verið stígandi í okkar leik.
Deildin er mjög jöfn. Allir geta unnið alla og ekki hægt að reikna með neinu fyrirfram. Markmið okkar er að gera betur en í fyrra og við leggjum okkur alla fram til þess,“ segir Dragan.
Ekki eru bara þrjú stig í húfi í kvöld heldur líka stolt í nágrannaslag. „Það er yfirleitt jákvæð og flott spenna milli þessara liða þegar þau spila. Ég vona að við náum að klára leikinn í kvöld,“ segir Dragan.
