Fjarðabyggð féll niður um deild

Botnbaráttunni í 2. deild karla er lokið í ár þrátt fyrir að tvær umferðir séu eftir. Knattspyrnufélagið Kári á Akranesi féll í gær eftir að hafa tapað 5-0 gegn Þrótti Vogum og í dag lauk baráttunni formlega þegar Fjarðabyggð tapaði á Eskjuvelli gegn Knattspyrnufélagi Fjallabyggðar 4-0.


Fyrr í dag lék Leiknir F. í Vesturbænum gegn KV. Liðin börðust á sitthvorum enda deildarinnar, Leiknir í botnbaráttu en KV um sæti í næstefstu deild. Leiknum lauk með 2-0 sigri KV þar sem bæði mörk KV komu í fyrri hálfleik en Leiknismanninum Almari Daða Jónssyni var vikið útaf á 80. mínútu þegar hann fékk að líta sitt annað gula spjald.


Stuðningsmenn Fjarðabyggðar voru því meðvitaðir um tap Leiknis F. þegar leikur Fjarðabyggðar og KF hófst. Með sigri hefði Fjarðabyggð haldið í vonina um að halda sér uppi í síðustu tveimur leikjum tímabilsins. Fjarðabyggð sá þó aldrei til sólar í leiknum og var staðan orðin 3-0 KF í vil í fyrri hálfleik. KF bætti svo við marki undir lok leiks og tryggðu sér góðan 4-0 sigur.


Fjarðabyggð gekk afar illa á tímabilinu og unnu ekki sinn fyrsta leik fyrr en 18. ágúst. Í kjölfarið kom annar sigurleikur sem vakti upp veika von um að liðið gæti haldið sér uppi. Sigrarnir komu þó of seint og mun liðið því leika í þriðju deild að ári. Með falli Kára og Fjarðabyggðar hefur Leiknir F. hins vegar tryggt veru sína í deildinni að ári.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.