Hann hefur minnkað vinnu töluvert frá fyrri tíð en hann var um langt skeið kallaður Þrívaktar-Hansi því hann tók glaður að sér allar vaktir sem hugsast gat og það á köflum í heilu sólarhringana. Hann tók meiraprófið fyrir rúmum sextíu árum og er enn að keyra stöku ferðir á rútum og langferðabílum.

Ef matur á borð við súra hrútspunga, kæstan hákarl, rengi eða lundabagga er hátt skrifaður hjá Austfirðingum er aldeilis góð tíð í vændum. Ein fjórtán þorrablót og ein góugleði eru skipulögð í fjórðungnum þetta árið samkvæmt úttekt Austurfréttar.

Þrettán manna hópur nema á þriðja ári í Listaháskóla Íslands hefur um tíma verið í sérstakri vinnustofuheimsókn á Seyðisfirði en þeirra heimsókn mun ljúka með opnun sérstakrar sýningar þeirra í Skaftfelli á föstudaginn kemur.

Jón Knútur Ásmundsson, Norðfirðingur og upplýsingafulltrúi hjá Austurbrú, fékk í gær viðurkenningu fyrir tvö ljóð í ljóðasamkeppninni Ljóðstafur Jóns úr vör. Jón Knútur sækir yrkisefni ljóða sinna úr hversdagslegum aðstæðum fremur en til að mynda fegurðar austfirskrar náttúru, sem hann segist blindur á, hafandi alist upp með hana fyrir augunum. Ungar íslenskar skáldkonur, húmor þeirra og hæfileikar, urðu Jóni Knúti hvatning til ljóðagerðar.

Mikla athygli vakti í liðnum desember þegar göngugarpurinn Einar Skúlason ákvað að ganga frá Seyðisfirði til Akureyrar sömu leiðina og landpóstar fyrr á öldum þurftu að fara oft á hverju ári. Almennt fer lítið fyrir sögu landpóstanna hvers starf var vafalítið með þeim allra erfiðustu á erfiðum tímum. Áhugasamir geta kynnt sér hluta þeirrar sögu á ágætu litlu safni að Ásbrandsstöðum í Vopnafirði.

Þrettán nemendur í húsasmíði og sex nemendur í vélvirkjun í Verkmenntaskóla Austurlands fengu í síðasta mánuði formlega afhent sveinsbréf sín við hátíðlega athöfn en það var jafnframt í fyrsta skipti sem slík sveinsbréf eru afhent á Austurlandi.