Mun færri konur eru á framboðslistum flokkanna fyrir alþingiskosningarnar á laugardag en í kosningunum 2003 og 2007. Hlutfall kvenna er nú rúm 40% en var rúm 47% árið 2007. Lakast er hlutfall kvenna í Norðausturkjördæmi eða 33% en hæst er hlutfallið í Reykjavíkurkjördæmi norður, 45%. Hlutfallslega fæstar konur eru í framboði fyrir P-lista Lýðræðishreyfingarinnar eða 19% en flestar hjá Samfylkingunni og Vinstri grænum, tæplega 51%. Frá þessu greinir á mbl.is.
Samkvæmt frétt mbl.is í dag hefur embætti ríkissaksóknara ákveðið að vísa kæru Heilbrigðisstofnunar Austurlands (HSA) á hendur Hannesi Sigmarssyni, yfirlækni við Heilsugæslu Fjarðabyggðar, frá. Hannesi var 12. febrúar síðastliðinn vikið tímabundið frá störfum vegna rannsóknar á reikningum frá honum. Eskfirðingar drógu í dag fána að húni til að fagna því að læknirinn hyggst snúa heim til starfa.
Týr, varðskip Landhelgisgæslunnar, er nú á leið til Íslands með þrjá grunaða fíkniefnasmyglara og skútu sem flutti efnin til Íslands í togi. Varðskipið náði skútunni miðja vegu milli Íslands og Hjaltlandseyja seint í gærkvöld. Reiknað er með að varðskipið nái höfn í kvöld eða nótt. Talið er að um sé að ræða stærsta eiturlyfjasmygl Íslandssögunnar, allt að hundrað og fimmtíu kílóum af hörðum efnum sem væntanlega eru amfetamín og kókaín. Sex menn hafa verið handteknir vegna málsins, þrír voru handteknir á Suðausturlandi og úrskurðaðir í gæsluvarðhald til 11. maí, en ekki er ljóst með varðhaldsúrskurði yfir þeim sem handteknir voru um borð í skútunni.
Mennirnir þrír sem handteknir voru um borð í smyglskútunni og fluttir með varðskipinu Tý til Eskifjarðar eru nú í yfirheyrslu hjá lögreglu á Egilsstöðum. Þegar búið verður að kveða upp gæsluvarðhaldsúrskurð yfir þeim við Héraðsdóm Austurlands eftir hádegi, verða þeir samkvæmt upplýsingum lögreglu fluttir með leiguflugi frá Egilsstaðaflugvelli til Selfoss.
Á Djúpavogi hafa heimamenn gantast með það í dag að dóp-góssið var tekið á land í svokallaðri
Gleðivík. Orti sveitarstjórinn, Björn Hafþór Guðmundsson, í morgunsárið af því tilefni eftirfarandi vísu: Gjálfrar alda í Gleðivík / glampar hlein í fjöru / fól ei verða fíkn af rík / fá að hanga í snöru.
Týr, varðskip Landhelgisgæslunnar, hefti um kl. hálfellefu í kvöld siglingu hinnar meintu dópskútu sem flutti eiturlyf upp að Austurlandi og sigldi svo á brott. Skútan var tekin djúpt undan Suðausturlandi. Sérsveitarmenn ríkislögreglustjóra fóru úr Tý yfir í skútuna og handtóku þar þrjá menn og færðu yfir í varðskipið í hald. Varðskipið mun nú færa skútuna til íslenskrar hafnar.
Varðskipið Týr er lagst við bryggju á Eskifirði og er með smyglskútuna, sem það stöðvaði og tók í tog í fyrrakvöld í hafinu milli Íslands og Færeyja, við stjórnborða. Týr lagði að um áttaleytið í morgun. Lögregla hafði töluverðan viðbúnað er skipið kom til hafnar. Þrír voru handteknir um borð í skútunni í fyrrakvöld, tveir Íslendingar og Hollendingur og verða þeir nú færðir fyrir Héraðsdóm Austurlands. Þar verða þeir yfirheyrðir og ákvörðun tekin í framhaldi af því um að óska eftir gæsluvarðhaldi. Að því búnu fara þeir í fylgd lögreglu með almennu farþegaflugi til Reykjavíkur í dag.
Félagið „Við erum sammála“ sem stendur að undirskriftalistanum sammala.is, efnir til fundar í Iðnó þriðjudaginn 21. apríl kl. 16.30-17.00. Í tilkynningu segir að þar muni sjö af þeim þúsundum Íslendinga sem þegar hafa skráð sig á listann skýra hvers vegna þeir eru sammála um að ríkisstjórnin, sem tekur við að loknum kosningum, eigi að hafa sem eitt af sínum forgangsverkefnum að hefja aðildarviðræður við Evrópusambandið og bera aðildarsamning undir þjóðaratkvæði.
Varðskip Landhelgisgæslunnar eltir nú meinta smyglskútu djúpt undan Suðausturlandi og munu vonir bundnar við að takist að ná skútunni innan skamms. Hún er sögð komin yfir miðlínu milli Íslands og Færeyja. Reynt verður að færa skútuna til hafnar, væntanlega á Austurlandi. Sérsveit ríkislögreglastjóra er í viðbragðsstöðu um borð í varðskipinu. Óljóst er hvaðan skútan er, en hún mun skráð erlendis. Ekki er vitað hversu margir eru um borð.