Nýlega kom út hjá Edizioni Plus í Písa ritið Discrimination and Tolerance in Historical Perspective í ritstjórn Guðmundar Hálfdanarsonar prófessors í sagnfræði við Háskóla Íslands. Í bókinni eru 22 greinar eftir 40 höfunda frá 16 löndum, en allir höfundarnir eru þátttakendur í öndvegisnetinu CLIOHRES.net, sem er styrkt af vísindaáætlun Evrópusambandsins. Verkefnið er til fimm ára og er skipulagt af 45 háskólum með þátttöku 180 fræðimanna frá 31 landi úr mismunandi fræðigreinum; sagnfræði, landafræði, listasögu, málvísindum, guðfræði, félagsfræði og heimspeki.
Þriðjudaginn 28. apríl var hinn sjötíu ára gamli Guttormslundur á Hallormsstað grisjaður í síðasta sinn.
Gróðursett var til Guttormslundar árið 1938 og er hann því rúmlega sjötugur. Hann er um hektari að flatarmáli og upphaflega voru gróðursettar þar um 5000 lerkiplöntur. Hann hefur verið grisjaður nokkrum sinnum, fyrst 1952 en síðast 1996 niður í rúmlega 600 tré. Við grisjunina nú verður um helmingur trjánna felldur og munu því standa eftir rúmlega 300 tré, en það er hæfilegur fjöldi miðað við hæð trjánna, sem er tæplega 20 metrar að meðaltali. Hæstu trén eru rúmlega 22 metrar.
Á fundi Úrskurðarnefndar sjómanna og útvegsmanna var ákveðið að hækka verð á slægðri ýsu, sem ráðstafað er til eigin vinnslu eða seld til skyldra aðila, um 10%. Verð á óslægðri ýsu var hækkað um 17% . Ákveðið var að hækka verð á karfa um 13%. Verð þetta gildir frá og með 1. maí 2009.
Þinghópur Borgarahreyfingarinnar lýsir yfir stuðningi við meginkröfur Hagsmunasamtaka heimilanna. Aðgerðir ríkisstjórnarinnar vegna íbúðarskulda ganga alltof skammt. Ekki nægir að bregðast við vanda heimila sem þegar eru komin í þrot. Gera þarf ráðstafanir til að koma í veg fyrir að tugþúsundir heimila fari sömu leið.
Á síðasta fundi hreppsnefndar Fljótsdalshrepps var bókað að sveitarstjórn þætti miður að Sauðarkofi og starfsemi sem honum fylgi séu í uppnámi. Fljótsdalshérað hafnaði í aprílbyrjun umsókn frá Jóni Þór Þorvarðarsyni um byggingarleyfi vegna Sauðarkofa. Í stað þess var honum gefinn frestur fram í mars á næsta ári til að fjarlægja kofann sem þar stendur. Fljótsdalshreppur hvetur Fljótsdalshérað til að setja Sauðárkofa inn á nýtt aðalskipulag sveitarfélagsins, svo hann geti áfram þjónað hlutverki sínu sem áningarstaður gangna- og hestamanna.
Fíkniefni fundust í húsleit lögreglu í Neskaupstað á föstudagskvöld. Var lagt hald á hvítt efni, nokkur grömm, sem talið er vera fíkniefni. Þá var maður yfirheyrður af lögreglu vegna gruns um að hann hefði ekið undir áhrifum fíkniefna og mun það tengjast fíkniefnunum sem fundust í húsinu. Málið er í rannsókn.
Frá byrjun fiskveiðiársins til 29. apríl sl. var þorskafli íslenskra skipa sem reiknaður er til aflamarks orðinn 113.205 tonn sem er 72,5% af leyfilegu aflamarki yfirstandandi fiskveiðiárs. Þetta er nokkuð minna nýtingarhlutfall sé miðað við sama tíma í fyrra þegar búið var að veiða 75,6%. Ákvörðun sjávarútvegs- og landbúnaðarráðherra um að auka aflamarkið um 30 þúsund tonn í janúar sl. gæti þar haft einhver áhrif.
Í gær fór fram í Fjarðabyggðarhöllinni þriðja Fjarðaálsmótið í ár, 4. flokkur karla og kvenna. Mótin fóru vel fram og voru vel lukkuð að flestu leyti. Mætt voru til leiks lið frá Siglufirði, Húsavík, Höfn, úr Fjarðabyggð og af Héraði.
Í 4. flokki kvenna var keppt í einum riðli, fimm lið.
Útivistartími barna og unglinga tók breytingum í gær, 1. maí. Frá þeim tíma mega börn 12 ára og yngri vera úti til klukkan 22 og unglingar 13 til 16 ára mega vera úti til miðnættis. Börn mega ekki vera á almannafæri utan fyrrgreinds tíma nema í fylgd með fullorðnum. Þetta kemur fram í tilkynningu frá lögreglunni.
