Hrafna Hanna í úrslit Idol
Hrafna Hanna Elísa Herbertsdóttir, 21 árs söngkona úr Djúpavogshreppi, komst á föstudagskvöld í úrslit Idol-Stjörnuleitar á Stöð 2.
Stórt fimleikamót framundan - undirbúningsfundur í dag
Laugardaginn 16. maí verður síðasta fimleikamót vetrarins í 1. deild Fimleikasambands Íslands haldið á Egilsstöðum. Aðkomufólk gæti orðið á fjórða hundrað talsins og keppendur verða um þrjú hundruð að meðtöldum keppendum fimleikadeildar Hattar. Auður Vala Gunnarsdóttir segir mótið verða eitt af þeim glæsilegri á þessum fimleikavetri sem nú er senn á enda. Mörg af bestu liðum landsins komi til mótsins. Í dag verður í Hettunni á Egilsstöðum haldinn undirbúningsfundur vegna mótsins og þeir sem vilja og geta lagt deildinni lið við undirbúninginn eru boðnir velkomnir. Fundurinn hefst kl. 18.
Fjöldi fyrirtækja í þrot
Fimm hundruð og áttatíu fyrirtæki í landinu eru komin í greiðsluþrot frá síðustu áramótum og hafa þrjú hundruð og nítján þeirra verið tekin til gjaldþrotaskipta. Samkvæmt tölum frá Creditinfo eru 78 byggingarfyrirtæki meðal þeirra og 61 fyrirtæki í verslun og þjónustu. Spáir Creditinfo að um þrjú þúsund og fimm hundruð fyrirtæki fari í gjaldþrot á árinu.
Síminn lokar á nafnlaus sms af vefsíðu
Ekki er lengur unnt að senda nafnlaus SMS skilaboð af vefsíðu Símans, heldur verða öll SMS skilaboð auðkennd með símanúmeri sendanda. Tilgangurinn er að auka öryggi við notkun SMS skilaboða. Einungis viðskiptavinir Símans munu eftirleiðis geta nýtt sér Vef-SMS og þá eingöngu með því að auðkenna sig með símanúmeri. Viðtakandi SMS-skilaboða veit því ávallt hver sendandinn er.
Þess eru dæmi að þjónusta á borð við auðkennislaus SMS hafi verið misnotuð í viðskiptum með fíkniefni sem og í eineltismálum.
Ert þú verðandi kvikmyndastjarna?
Zik Zak kvikmyndir og Gunnar B. Guðmundsson leikstjóri Astrópíu leita að fólki frá 14 ára og upp úr í aðal- og aukahlutverk kvikmyndar byggðri á sögunni Gauragangur eftir Ólaf Hauk Símonarson. Fólk getur komið í Sláturhúsið á Egilsstöðum í dag fram til kl. hálffjögur og látið máta við sig hin ýmsustu hlutverk, meðal annars aðalhlutverk sjálfs Orms Óðinssonar.
Nýr formaður Hattar
Formannsskipti hafa orðið hjá íþróttafélaginu Hetti. Davíð Þór Sigurðarson tók í lok apríl við starfinu af Helga Sigurðssyni tannlækni, sem farið hefur fyrir félaginu undanfarin ár. Davíð Þór er 26 ára gamall, viðskiptafræðingur og starfar sem sérfræðingur í fjármálateymi fyrir steypuskála Alcoa Fjarðaáls. Hann er fæddur á Egilsstöðum, uppalinn á Seyðisfirði og lék lengi knattspyrnu með Huginn. Hann er búsettur á Egilsstöðum og kvæntur Eddu Ósk Gísladóttur. Þau eiga son á öðru ári. Davíð Þór sat áður í stjórn Hattar í eitt ár.
Afrískur galdur í snjókomunni
Leikskólabörn af leikskólanum Tjarnarlandi á Egilsstöðum og mæður þeirra sýndu tilþrif í íþróttahúsi bæjarins í morgun undir villtum trumbuslætti. Var börnum og mæðrum boðið í afró-sveiflu í tilefni af mæðradeginum á sunnudag. Afríska trommutónlistin náði augljóslega vel til krakkanna sem sveifluðu sér í dansinum ekki síður en mömmurnar.
Ályktun um húsnæðisskuldir heimilanna
Á fundi sínum 6. maí samþykkti stjórn Neytendasamtakanna svohljóðandi ályktun um húsnæðisskuldir heimilanna:
Stjórn Neytendasamtakanna minnir á að allt frá hruni bankakerfisins í byrjun október hefur það verið markmið bæði fyrri ríkisstjórnar og þeirrar sem nú situr að tryggja stöðu heimilanna í landinu og sérstaklega þeirra sem lakast standa.
Bæjarstjórn Fjarðarbyggðar biðlar til heilbrigðisráðherra um lausn á yfirlæknismáli
Bæjarstjórn Fjarðabyggðar sendi frá sér ályktun í kvöld þar sem skorað er á heilbrigðisráðherra að hlutast til um mál yfirlæknis heilsugæslunnar í sveitarfélaginu. „Traust og góð heilsugæsla er meðal þeirra grundvallarlífsgæða sem sóst er eftir í hverju samfélagi. Fátt skiptir heimili jafn miklu máli og góð og persónuleg þjónusta heimilislæknis. Bæjarstjórn Fjarðabyggðar lýsir áhyggjum af þeirri stöðu sem við er að glíma í heilsugæslu innan sveitarfélagsins og því óefni sem við blasir á Eskifirði.
