Fram hefur komið í fjölmiðlum að heilbrigðisráðherra íhugi að leggja á sérstakan sykurskatt til að hamla gegn tannskemmdum barna og unglinga. Þetta er ekki í fyrsta skipti sem slíkar hugmyndir koma fram. Á haustdögum 2004 voru slíkar hugmyndir til umræðu. Á þingi Neytendasamtakanna sem haldið var í september það ár var samþykkt svohljóðandi ályktun gegn sykurskatti:
„Þing Neytendasamtakanna hafnar hugmyndum um sérstakt gjald á sykur og gosdrykki. Sykur og sælgæti er samkvæmt könnun Hagfræðistofnunar 63% dýrara hér en að meðaltali í Evrópu. Þing Neytendasamtakanna telur að beita þurfi öðrum aðgerðum vegna mikillar sykurneyslu, m.a. fyrirbyggjandi fræðslu í skólum. Sérstök skattlagning er neyslustýring og leiðir til aukinna útgjalda heimilanna.”
Dagana 15. og 16. maí heldur Slysavarnafélagið Landsbjörg landsþing sitt í Íþróttahöllinni á Akureyri. Landþingið sækja um 500 félagar úr slysavarnadeildum og björgunarsveitum af landinu öllu. Landsþing félagsins er haldið annað hvert ár og er stærsta samkoma þess. Á þinginu er kosin ný stjórn, farið yfir reikninga og málefni þessa stóra félags, sem í eru um 18.000félagsmenn, rædd vítt og breytt.
Roknaveiði hefur verið í Breiðdalsá síðan veður skánaði og dæmi um að allt að fimmtíu bleikjur hafi fengist á þrjár stangir. Segir Þröstur Elliðason hjá Strengjum að þetta lofi mjög góðu og meira líf virðist vera á svæðinu en undanfarin ár á sama tíma. Sjóbleikjuveiði í Fögruhlíðarárósi og á hinum nýju veiðisvæðum í Jöklu hefst 1. júní.
Kór Hvammstangakirkju heldur tónleika í Kirkju- og menningarmiðstöðinni á Eskifirði 16. maí kl. 17:00
Efnisskráin er fjölbreytt og býður bæði upp á kirkjulega og veraldlega tónlist. Stjórnandi Pálína Fanney Skúladóttir. Aðgangseyrir er enginn og allir eru hjartanlega velkomnir.
Könnun Ferðamálastofu um ferðaáform Íslendinga innanlands gefur til kynna að níu af hverjum tíu Íslendingum ætli að ferðast innanlands í sumar. Það er nokkru hærra hlutfall en fyrri kannanir Ferðamálastofu hafa sýnt.
Fjölskylda og vinir Borgfirðingsins Helga Magnúsar Arngrímssonar, sem lést fyrir nokkru, ætla að efna til stórtónleika í Fjarðarborg föstudaginn 12. júní, á afmælisdegi Helga. Með þeim á að minnast Helga á skemmtilegan og hugljúfan hátt, með sérstaka áherslu á tónlist sem honum var kær.
Síðari dagur vorfundar Samtaka félagsmálastjóra af landinu öllu er á Egilsstöðum í dag. Er fundurinn samráðsvettvangur yfirstjórnenda velferðarþjónustu sveitarfélaganna. Meðal þess sem rætt er á fundinum eru efnahagsmálin, áhrif þeirra á velferðarþjónustu og barnavernd og endurskoðun barnaverndarlaga. Sigrún Harðardóttir, doktorsnemi í félagsráðgjöf kynnir verkefni sitt um stöðu nemenda með ADHD innan skólakerfisins og það úrræða- og þekkingarleysi í umhverfi barnanna sem kemur í veg fyrir að þau geti nýtt þroskamöguleika sína sem skyldi.
Málþing um Einar Braga og atómskáldin verður haldið í Þórbergssetri 21. og 22. maí. Málþingið hefst kl. 14:00 á uppstigningardegi 21. maí og lýkur kl. 14:00 á föstudeginum 22. maí. Fluttir verða fyrirlestrar um lífsstarf Einars Braga út frá ýmsum sjónarhornum, sem og um önnur „atómskáld.“ Framsögumenn eru Pétur Gunnarsson, Eystinn Þorvaldsson, Aðalsteinn Ásberg Sigurðsson, Jórunn Sigurðardóttir, Guðbjörn Sigurmundsson, Soffía Auður Birgisdóttir, Fjölnir Torfason og Svavar Steinarr Guðmundsson.
Gæsluvarðhald yfir sex mönnum sem taldir eru hafa staðið fyrir smygli á meira en hundrað kílóum fíkniefna til landsins með skútu hefur verið framlengt til næstu mánaðarmóta.
Fjórir mannanna munu sitja í gæsluvarðandi til 29. maí en tveir til 2. júní. Þeir munu allir hafa komið við sögu í öðrum fíkniefnamálum áður, Íslendingarnir hérlendis en Hollendingurinn í sínu heimalandi. Sá hafði komið nokkrum sinnum til landsins áður en Landhelgisgæslan náði honum á hafinu milli Íslands og Færeyja á skútunni, sem siglt var að Papey.