Megas á Norðfirði í kvöld
Megas og Senuþjófarnir halda tónleika í Hótel Egilsbúð í Neskaupstað í kvöld.
Miðasala hafin á Bræðsluna
Hafin er miðasala á tónlistarviðburðinn Bræðsluna, sem haldin verður á Borgarfirði eystra 24. til 26. júlí. Bræðslutónleikar hafa alltaf verið sérstaklega eftirminnilegir og þar ríkt mikil stemning meðal gesta. Tónlistarflutningur í Bræðslunni þetta árið verður í höndum Hins íslenska Þursaflokks, Páls Óskars Hjálmtýssonar og Monicu Abentroth ásamt strengjasveit og hljómsveitarinnar Bróður Svartúlfs. Hún sigraði Músíktilraunir í vor. Miðasala fer fram á vefsíðunni www.midi.is.
Síldin streymir inn
Mikil stemning var á höfninni í Neskaupstað í gær þegar flaggskipið Margrét EA 710 kom inn með 1100 tonn af síld eftir tæplega sólarhrings veiðar á Drekasvæðinu. Aflinn fékkst í tveimur holum. Veðrið var sæmilegt á miðunum, en áhöfnin talaði um að lítið yrði vart við sumarkomu þar úti enn sem komið væri. Menn voru brattir og ánægðir með fenginn. Síldin fer öll til manneldis og verður væntanlega búið að landa henni í kvöld. Skipið fer aftur á Drekasvæðið að lokinni löndun.
Blak: Landsliðið vann Lúxemborg
Íslenska kvennalandsliðið í blaki vann í gær lið Luxemborgar 3-0 á smáþjóðaleikunum. Þrír leikmenn frá Þrótti Neskaupstað eru í liðinu.
Franskir flökunarhnífar
Safnið Fransmenn á Íslandi á Fáskrúðsfirði fékk á dögunum flökunarhnífa sömu gerðar og notaðir voru af frönskum skútusjómönnum hér við land á árum áður. Það var Jean Le Tellier sem er mikill áhugamaður um Ísland og gefur út fréttabréf á frönsku um Ísland, Courrier D´Islande, sem færði safninu þessa einstöku gjöf.
Kveikt í gróðri
Slökkvilið var kallað að landskika við afleggjarann að Miðhúsum við Egilsstaði seint í fyrradag, en þar kraumaði eldur í móanum. Logn var og því breiddist eldurinn ekki út að ráði. Talið er víst að einhver hafi hent logandi vindlingi í gróðurinn og þar sem mjög þurrt hafði verið dagana á undan, leiddi það til íkveikju. Slökkviliðið slökkti eldinn á stuttum tíma og skikinn sem brann er ekki stór. Þarna hefði þó getað farið verr, því skógræktarsvæði liggja að skikanum. Aldrei verður nógsamlega brýnt fyrir fólki að fara varlega með eld og hvorki kasta logandi vindlingum frá sér né skilja eftir grill með lifandi kolum í náttúrunni.
Nýr löndunarkrani á leiðinni og afskipanir framundan
Nú á næstunni er búist við tveimur flutningaskipum til landsins á vegum HB Granda. Um helgina er von á flutningaskipinu Ice Louise til Vopnafjarðar frá Noregi með löndunarkrana fyrir fiskimjölsverksmiðjuna, sem er enn einn liðurinn í öflugri uppbyggingu uppsjávarvinnslu félagsins á staðnum. Í næstu viku verður svo flutningaskipið Viking Frio á ferðinni í Reykjavík og síðan er von er á skipinu til Vopnafjarðar þar sem lestaðar verða ýmiss konar afurðir til útflutnings.
Borgfirðingar sjá fyrir sér áhrif fyrningaleiðar
Á borgarfjordureystri.is er greint frá fyrstu útgerðinni sem farið hafi á hvolf vegna yfirvofandi fyrningarleiðar í sjávarútvegi þótt áætlanir stjórnvalda séu ekki enn komnar til framkvæmda. Vefurinn birtir myndir af bát Bergbjarnar og Móra Group ehf. á hvolfi – enda ætla margir að slíkt verði örlög útgerða gangi fyrirætlanirnar eftir.Hrifinn af Ívari Ingimarssyni
Steve Coppell, sem á dögunum ákvað að hætta störfum sem knattspyrnustjóri enska 1. deildar liðsins Reading, hældi Stöðfirðingnum Ívari Ingimarssyni í hástert í viðtali við Reading Evening Post í gær. Hann segir m.a. að kaupin á Ívari séu þau bestu sem hann gerði í þau fimm og hálft ár sem hann var við stjórnvölinn hjá félaginu.
