Nýr forstöðumaður bókasafnsins í Neskaupstað, Óskar Þór Þráinsson, hefur hafið störf. Óskar Þór er nýfluttur á Norðfjörð og mun sjá um rekstur almenningsbókasafnsins í Neskaupstað og Skólabókasafns Nesskóla. Óskar Þór er bókasafns- og upplýsingafræðingur og hefur starfað á sviði skjalastjórnunar og upplýsingaþjónustu undanfarið ár en hefur mikla reynslu og þekkingu á bókmenntum, þjónustu, rafrænum miðlum og upplýsingatækni. Óskar Þór býður bæjarbúa og sveitamenn á öllum aldri velkomna á bókasafnið og kallar eftir óskum og hugmyndum, nú eða bara spjalli yfir kaffibolla.
Góðar horfur eru á mörkuðum fyrir síldarafurðir nú í upphafi veiða á norsk-íslensku síldinni, að því er Gunnþór Ingvason, framkvæmdastjóri Síldarvinnslunnar í Neskaupstað, sagði í samtali við Fiskifréttir í gær. Mikil áhersla er lögð á síld til manneldis. Hjá Síldarvinnslunni eru aðallega frystir flapsar fyrir Austur- Evrópumarkað. Gunnþór sagði að síldin seldist ágætlega þrátt fyrir efnahagsþrengingar margra ríkja í austri enda væri síldin ódýr vara. Verð á frosinni síld hefur verið nokkuð stöðugt í erlendri mynt en hefur þó heldur hækkað. Skilaverð er í kringum 900-1.100 dollarar á tonnið. Gott verð á bræðsluafurðum.
Meðal þeirra gagna sem byggt var á við mótun aðalskipulags fyrir Fljótsdalshérað er gríðarlega umfangsmikið ritverk sem Helgi Hallgrímsson, náttúrufræðingur á Egilsstöðum, hefur tekið saman og hann nefnir Náttúrumæraskrá. Þar lýsir Helgi landslagi og örnefnum á rúmlega 600 stöðum og svæðum auk annarra atriða í náttúrufari Fljótsdalshéraðs, svo sem plöntum, fuglum og fiskum. Náttúrumæraskráin er aðgengileg gegnum vef Fljótsdalshéraðs, www.fljotsdalsherad.is.
Fyrir nokkru lauk lauk tilraunaborunum á Fagradal á Fljótsdalshéraði, sem leiddu til þess að þar fannst mikið af afar góðu neysluvatni. Gæði neysluvatns í þéttbýli sveitarfélagsins, sérstaklega í Fellabæ, hafa ekki verið í nógu góðu lagi. Hitaveita Egilsstaða og Fella, sem jafnframt fer með neysluvatnsmálin, vinnur nú að undirbúningi framkvæmda sem gert er ráð er fyrir að hefjist síðla sumars.
Helga Jónsdóttir, bæjarstýra í Fjarðabyggð, var meðal þeirra tíu sem í dag fengu fálkaorðuna. Orðan var afhent af forseta Íslands, Ólafi Ragnari Grímssyni, við hátíðlega athöfn á Bessastöðum. Helga hlaut riddarakross hinnar íslensku fálkaorðu fyrir framlag sitt til opinberrar stjórnsýslu.
Sýningin Testosterone verður opnuð hátíðisdaginn 17. júní kl. 17 í menningarmiðstöðinni Sláturhúsinu á Egilsstöðum. Þetta er samsýning fjögurra karlkyns listamanna; þeirra Eyjólfs Skúlasonar (höggmyndalist), Grétars Reynissonar (mynd- og höggmyndalist) Kormáks Mána Hafsteinssonar (ljósmyndir),Skarphéðins G. Þórissonar (ljósmyndir) og Skarphéðins Þráinssonar (ljósmyndir).
Ungmenni frá ungliðadeild Björgunarsveitarinnar Héraðs ganga nú í hús hjá fyrirtækjum og einstaklinum og safna áheitum vegna fyrirhugaðrar göngu upp á Kárahnjúk, Þeim hafði ekki orðið mikið ágengt þegar þau knúðu dyra hjá Austurglugganum, en hafa ber í huga að innan tíðar verður það þetta unga fólk sem stendur upp frá því sem það er að gera í hvaða aðstæðum sem vera kann og fer til leitar og björgunar þeim sem á þurfa að halda og oft við erfiðustu aðstæður.
Norrænir forsætisráðherrarnir skemmtu sér í útsýnisferð um Fljótsdalshérað í dag. Í gær funduðu þeir á Egilsstöðum.
