Mengun þungmálma og annarra eiturefna í hafinu umhverfis landið er almennt vel undir alþjóðlegum viðmiðunarmörkum, að því er fram kemur í nýrri skýrslu Matís um breytingar á lífríki sjávar við landið (AMSUM 2008). Styrkur kadmíns í íslenskum kræklingi er hærri en í kræklingi frá hafsvæðum Evrópu og Ameríku.
Unnið er að samkomulagi milli Flugstoða og sveitarfélagsins Fjarðabyggðar um rekstur Norðfjarðarflugvallar.Þjónustusamningur milli þessara tveggja aðila er útrunninn og hafa flugstjórar sjúkraflugs hjá Mýflugi tjáð áhyggjur af ástandi vallarins til heilbrigðis- og samgönguráðuneytis með bréfi.
Í vikunni boðaði móttökufulltrúi nýrra íbúa til fundar á Stöðvarfirði. Á fundinn mættu embættismenn Fjarðabyggðar, fulltrúar frá Krabbameinsfélagi Austurlands og Þekkingarnetinu og fjöldinn allur af Stöðfirðingum.
Í tilefni af góðri veðurspá næstu daga ætla Seyðfirðingar að bjóða öllum, gestum og gangandi, í sund án endurgjalds í dag og á morgun. ,,Fögnum veðurblíðunni, kælum okkur í sundi og njótum þess að vera til. Sólarkveðjur frá Seyðisfjarðarkaupstað,“ segja heimamenn.
Hornfirðingurinn og Nesjamaðurinn Pálmar Hreinsson hefur undanfarin þrjú ár búið í Svíþjóð og starfar sem fitness þjálfari hjá fótboltaliði í Stokkhólmi. Hann tók um sl. helgi þátt í Sænska meistaramótinu í Cross-Fit og gerði sér lítið fyrir og varð Svíþjóðarmeistari í þessari vinsælu og stöðugt vaxandi þrekíþrótt.
Málþing um valdeflingu í verki, á vegum Hlutverkaseturs, Rauða kross Íslands, Félags- og tryggingamálaráðuneytisins og SAust, verður haldið í SafnaðarheimilinuNeskaupstað á morgun, 10. september nk.kl. 8.30 – 16.00. Málþingið á erindi við alla, fagfólk í heilbrigðis- og félagsþjónustu, stjórnmálamenn, atvinnulíf, menntastofnanir sem og almenna borgara.
Nú styttist í að þær breytingar á sorphirðu á Fljótsdalshéraðs, sem ákveðnar hafa verið með samningi við Íslenska gámafélagið, taki gildi, með enn frekari áherslu á flokkun og endurvinnslu.
Loks hefur fundist lausn á því hver á að bera kostnað vegna viðgerðar á þakköntum Fjarðabyggðarhallarinnar á Reyðarfirði. Landsafl, dótturfélag Landic Property skal borga brúsann samkvæmt dómskvöddum matsmanni. Málið hefur verið til meðferðar í hartnær tvö ár. Áætlaður kostnaður er um 18 milljónir króna. Landsafl byggði Fjarðabyggðarhöllina og leigir hana til sveitarfélagsins Fjarðabyggðar.
Vísindagarðurinn vill vekja athygli á Vísindakaffi á morgun, þar sem Sverrir Aðalsteinn Jónsson líffræðingur mun halda fyrirlestur um gróðurfarsögu á Fljótsdalshéraði síðustu tvö þúsund árin. Fyrirlesturinn verður haldinn í Gistihúsinu Egilsstöðum og hefst kl. 16:30.