Fjórði hafnarfundur Hafnasambands Íslands var haldinn í dag í Kirkju- og menningarmiðstöðinni á Eskifirði. Á fundinn mættu hátt í 60 fulltrúar frá öllum landshlutum. Að loknum fundinum var farið með fulltrúana í kynnisferð um Fjarðabyggð en dagurinn endaði með móttöku í Randúlfssjóbúð.Gísli Gíslason, formaður stjórnar Hafnasambands Íslands segir hag íslenskra hafna bágborinn.
Skátafélagið Héraðsbúar verður með kvöldvöku í skátarjóðrinu í Selskógi á sunnudag kl. 17. Skátastarfið verður kynnt, nýir skátar vígðir og eldri skátar vígðir upp í eldri flokka. Auk þess verður sungið og farið í leiki. Héraðsbúar verða með skemmtiatriði. Gestir eru hvattir til að koma með teppi til að sitja á. Unnt er að nálgast skráningarblað fyrir ný börn sem vilja taka þátt í skátastarfinu hjá Þórdísi skátaforingja á kvöldvökunni. Þeir sem vilja koma að skátastarfinu með krökkunum eru jafnframt beðnir um að láta skátaforingjann vita.
Á fundi bæjarstjórnar Fljótsdalshéraðs 16.09. sl. var fjallað um atvinnumál á svæðinu og horfurnar á komandi mánuðum. Þórarinn Sveinsson atvinnufulltrúi Fljótsdalshéraðs hefur undanfarnar vikur haft samband við marga forsvarsmenn atvinnufyrirtækja í sveitarfélaginu og kannað stöðuna.
Bæjarstjórn Fljótsdalshéraðs ætlar að hætta við eignarnám á landi Egilsstaða II undir Egilsstaðakolli fyrir tjaldsvæði. Miðbæjarskipulag gerði ráð fyrir nýju tjaldsvæði þar, en nú liggur fyrir að unnt er að hefja framkvæmdir við tjaldsvæði á svonefndum Barrareit við Kaupvang, skammt frá núverandi tjaldsvæði. Þetta var samþykkt á fundi bæjarstjórnar í vikunni og bæjarstjóra falið að vinna að framgangi málsins.
Á morgun, föstudaginn 18. september, milli kl. 14 og 18, verður ný viðbygging Egilsstaðaskóla til sýnis fyrir íbúa sveitarfélagsins sem og aðra.Í haust var kennslurými nýrrar bygginar tekið í notkun, þ.e. almennar kennslustofur og sérgreinastofur. Stefnt er að því að sá hluti nýbyggingarinnar sem hýsir hverfismiðstöðina, með sal, mötuneyti og sérútbúnum stofum, verði tekinn í notkun haustið 2010. Á sama tíma er stefnt að því að búið verði að endurbæta eldri hluta skólabyggingarinnar.
Minningarsjóður (sjálfseignarstofnun) hefur verið stofnaður til minningar um Guðlaug Magna Óðinsson sem lést í bílslysi í Fáskrúðsfirði, þann 16. maí síðastliðinn, aðeins 17 ára gamall. Sjálfseignarstofnunin heitir Minningarsjóður Guðlaugs Magna Óðinssonar og starfar samkvæmt lögum nr. 19/1988.
Mánudaginn 21. september, kl. 20.00 – 22.00 verður fræðslufundur með Helgu Margréti Guðmundsdóttur verkefnisstjóra hjá Heimili og skóla.Helga Margrét mun fjalla um gildi foreldrasamstarfs og mikilvægi þess að tengiforeldrar séu virkir. Nýstofnuð samtök foreldrafélaga á Fljótsdalshéraði, Héraðsforeldrar, standa fyrir fræðslufundinum.Allir foreldra grunnskólabarna á Fljótsdalshéraði eru hjartanlega velkomnir en nýskipaðir tengiforeldrar eru sérstaklega beðnir um að mæta auk foreldra sem eru í stjórnum og varastjórnum foreldrafélaga skólanna. Fræðslufundurinn er haldinn í Hlymsdölum, félagsaðstöðu eldri borgara í Miðvangi á Egilsstöðum.
Fulltrúar hestamannafélagsins Blæs óskuðu eftir fjárstuðningi til byggingar reiðskemmu í Norðfirði á fundi með bæjarráði Fjarðabyggðar nú í vikunni. Samkvæmt samningi milli Blæs og landbúnaðarráðuneytisins þarf að hefja byggingu reiðskemmunar í haust. Í bókun bæjarráðs segir að ráðið sé sammála um að leita allra leiða til þess að af byggingu reiðskemmunnar geti orðið.
Nýtt verksmiðjuhús HB Granda á Vopnafirði, sem hýsa mun fiskmjölsverksmiðju félagsins, er nú sem óðast að taka á sig mynd. Framkvæmdum miðar vel en starfsmenn Héðins hf. hófu að reisa stálgrind verksmiðjuhússins um síðustu mánaðamót. Áður var búið að steypa hús, sem hýsa mun stjórnstöð verksmiðjunnar, skrifstofur, rannsóknastofu og starfsmannarými.