Samtök Eiðavina hittast á Eiðum í dag til að halda aðalfund félagsins. Getur fyrrverandi Eiðafólk hist og rifjað í sameiningu upp liðna tíma og fræðst um framgang verkefnisins Sögustofa á Eiðum. Fundurinn hefst kl. 14 og eru allir velkomnir.
Sony er búið að gefa út Seyðisfjarðarauglýsingu sína; Sony Soundville, sem gefur býsna skemmtilega og furðulega mynd af hljóðbænum Seyðisfirði. Slóðin er http://www.sony.co.uk/article/sony-soundville#/art
Sýslumannsembættið á Eskifirði hefur vísað frá máli yfirlæknis við Heilsugæslu Fjarðabyggðar. Þetta er í annað skiptið sem rannsóknardeild lögreglunnar á Eskifirði vísar máli læknisins frá á grundvelli fyrirliggjandi gagna. Ríkisendurskoðun tók málið upp og kærði til Ríkissaksóknara, sem sendi málið aftur heim í hérað til rannsóknar. Ríkisendurskoðun mun væntanlega í kjölfarið taka afstöðu til hvort kyrrt verður látið liggja eða óskað eftir endurupptöku.
Stuðningsmenn yfirlæknisins á Eskifirði telja víst að yfirlæknirinn muni fara í meiðyrðamál við þá aðila innan Heilbrigðisstofnunar Austurlands (HSA) sem upphaflega kærðu hann til lögreglu vegna gruns um fjármálamisferli.
Hópur Seyðfirðinga og Héraðsbúa gengur nú í fjórða sinn yfir Fjarðarheiði til að vekja athygli á óviðunandi ástandi samgangna við Seyðisfjörð. Í því skyni er efnt til almennrar hópgöngu yfir Fjarðarheiði a.m.k. ársfjórðungslega þar til komin eru jarðgöng sem tengja Seyðfirðinga við önnur byggðalög. Gangan hófst í morgun kl. 9 og er gengið frá Seyðisfirði til Egilsstaða. Nú er norðaustanátt á heiðinni, slydda og um 11m/sek. Í dag er Haustroðahátíð á Seyðisfirði og fjölbreytt dagskrá í boði fyrir gesti og heimamenn.
Gallerí Snærós á Stöðvarfirði opnar sýningu á færeyskri grafík á morgun, laugardag, kl. 17. Hinn þekkti grafíklistamaður Ríkharður Valtingojer, sem býr og starfar á Stöðvarfirði og rekur þar alþjóðlegt grafíksetur, dvaldi nýverið í Færeyjum, hitti þar grafíklistamenn og valdi verk á sýninguna. Hann segir koma á óvart þann mikla áhuga sem færeyskur almenningur hafi á myndlist og þar sé allt annað umhverfi en tíðkist hér á landi. Þetta er í annað sinn sem Gallerí Snærós sýnir norræn verk, en áður hefur verið haldin grafíksýning með verkum frá Svíþjóð. Færeyska sýningin stendur til 1. nóvember.
Héraðsverk hefur sagt upp flestum þeim starfsmönnum sem starfa úti í verkum. Hilmar Gunnlaugsson, stjórnarformaður fyrirtækisins, segir ástæðuna vera að fyrirséð er að starfsemi félagsins verði í lágmarki yfir vetrarmánuðina.
Verklokum var fagnað í Fljótsdalsstöð Kárahnjúkavirkjunar í gær. Friðrik Sophusson lauk þá rúmlega ellefu ára embættistíð sinni sem forstjóri Landsvirkjunar. Katrín Júlíusdóttir iðnaðarráðherra sagði í ávarpi að mikilvægt væri að sátt næðist um framtíðarnýtingu auðlinda Íslendinga og áhersla yrði lögð á að rammaáætlun um verndun og nýtingu vatnsafls og jarðvarma yrði lögð fyrir á yfirstandandi þingi og lögfest. Agnar Olsen, settur forstjóri Landsvirkjunar uns Hörður Arnarson tekur við um áramót, afhenti Björgunarsveitunum á Héraði og Jökuldal milljón krónur hvorri í styrk. Karlakórinn Drífandi á Fljótsdalshéraði söng í hófinu og Sr. Lára G. Oddsdóttir, sóknarprestur Valþjófsstaðarprestakalls minntist þeirra fimm manna sem létust meðan á byggingu virkjunarinnar stóð.
Hæstiréttur hefur staðfest dóm Héraðsdóms Reykjavíkur um að fyrrverandi stjórnarformaður og hluthafi í Trésmiðju Fljótsdalshéraðs, Jónas A. Þ. Jónsson, skuli endurgreiða þrotabúi fyrirtækisins rúmar 134 milljónir króna með dráttarvöxtum. Er um að ræða mismunandi háar upphæðir sem millifærðar voru af reikningum fyrirtækisins til stjórnarformannsins. Jónas skaut málinu til Hæstaréttar í febrúar sl. Þrotabúi Jónasar er jafnframt gert að greiða 600.000 krónur í málskostnað fyrir Hæstarétti.
Svo hvasst var fyrir ofan Eskifjörð í morgun að hjólhýsi fauk aftan af bifreið á Sandskeiði og skemmdist mikið. Enginn slasaðist og ökumaðurinn náði að halda bifreiðinni á veginum. Hjólhýsið er sagt ónýtt.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.