Við mat á umhverfisáhrifum Kárahnjúkavirkjunar heimilaði umhverfisráðherra framkvæmd Kárahnjúkavirkjunar að uppfylltum 20 skilyrðum. Nú er framkvæmdum lokið og birtir Landsvirkjun á heimasíðu sinni yfirlit yfir hvernig Landsvirkjun uppfyllti skilyrði umhverfisráðherra: www.lv.is.
Ferðahandbókin Lonely Planet segir Ísland bestu kaupin í ferðum árið 2010 eins og fram kemur í frétt frá Ferðamálastofu: http://www.ferdamalastofa.is Þetta eru góð tíðindi fyrir ferðaþjónustuna og athygli vekur að Seyðisfjörður er númer níu á lista sem Lonely Planet nefnir ,,Our top picks for Iceland" á síðu sinni: http://www.lonelyplanet.com/iceland. Seyðfirskir ferðaþjónustuaðilar eru að vonum ánægðir með þessa niðurstöðu.
Þröstur Elliðason hjá Veiðiþjónustunni Strengjum segir nú lokatölur í veiði komnar í hús og ekki annað hægt en að vera ánægður með veiðisumarið. Til dæmis veiddust 319 laxar úr Jöklu, sem er mikil aukning frá fyrra ári.
Lögbann hefur verið sett á nýtingu 500 milljóna króna hlutafjár sem fékkst í hlutafjáraukningu Eskju hf. á Eskifirði í byrjun október. Landsbankinn fór fram á lögbannið en ágreiningur er á milli bankans og hluthafanna um verðmat á fyrirtækinu sem lá til grundvallar hlutafjáraukningunni. Landsbankinn telur verðmætið hafa verið of lágt, sem leiddi til þess að stærri hluti fyrirtækisins hafi fengist fyrir upphæðina en ella hefði verið. Málið verður rekið fyrir Héraðsdómi Austurlands og þar skorið úr um hæfilegt verðmat á Eskju hf.
Um og yfir 300 manns mættu á fund um málefni Heilsugæslu Fjarðabyggðar, sem haldinn var á Eskifirði í gærkvöld. Til fundarins var boðað af stuðningsmannahópi Hannesar Sigmarssonar yfirlæknis Heilsugæslu Fjarðabyggðar, sem leystur var tímabundið frá störfum vegna rannsóknar á oftöku launa vegna læknisverka í febrúar sl. Fundurinn samþykkti einróma þrjár ályktanir sem varða heilbrigðismál í sveitarfélaginu, m.a. um að Fjarðabyggð sjái sjálf um rekstur heilbrigðisþjónustu.
Á morgun laugardag opna þrjár nýjar sýningar í Skaftfelli á Seyðisfirði, allar kl. 16. Nemendur 7.-10. bekkjar Seyðisfjarðarskóla opna eina þeirra í aðalsal Skaftfells, Hildur Björk Yeoman opnar aðra á Vesturvegg og Ásdís Sif Gunnarsdóttir, Daníel Björnsson, Hekla Dögg Jónsdóttir og Sirra Sigrún Sigurðardóttir opna þriðju sýninguna í Bókabúðinni, verkefnarými Skaftfells.
Stjórn Bláu kirkjunnar á Seyðisfirði fékk nýverið Rannveigu Þórhallsdóttur til þess að fara í gegnum skjöl og önnur gögn úr dánarbúi Muff Worden tónlistarmanns sem lést fyrir fáum árum. Tilgangurinn var að gera ævi Muff skil, en hún var stofnandi Bláu kirkjunnar, sem staðið hefur fyrir sumarlöngum tónlistarflutningi um árabil. Á forsíðu vefsíðunnar www.blaakirkjan.is má smella á krækjuna ,,Um Bláu kirkjuna" og síðan á krækjuna ,,Muff Worden" til að lesa texta Rannveigar og skoða myndir.
Heinabergsjökull í Vatnajökli hefur hopað um 80 metra að norðan, samkvæmt mælingum jarðfræðinema úr Framhaldsskólanum í Austur-Skaftafellssýslu í síðustu viku. Sunnanvert hefur jökullinn eitthvað gengið fram.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.