Tækniminjasafn Austurlands á Seyðisfirði á 25 ára afmæli á þessu ári. Til þess að fagna þessum áfanga verður haldið afmælisboð á safninu á morgun, laugardag, milli kl. 16 og 17. Sýningin ,,Safn á leiðinni" verður opnuð og gestir fá tækifæri til þess að skoða hana með leiðsögn starfsmanna.
Menningar- og íþróttanefnd Fljótsdalshéraðs ákvað á fundi sínum í vikunni að verða við umsókn Ernu Friðriksdóttur um styrk vegna þátttöku á Paralympics 2010 í Vancouver í Kanada 12.-21 mars. Erna er nú í 20. sæti á heimslistanum í skíðaíþróttum fatlaðra og hefur tryggt sér keppnisrétt á Paralympics 2010.
Séra Hjálmar Jónsson kynnir ævisögu sína ,,Hjartsláttur” í Kirkju-og menningarmiðstöðinni miðvikudaginn 25.nóvember kl.20.00. Allir hjartanlega velkomnir. Aðgangur ókeypis.
Bæjarráð Fljótsdalshéraðs hefur gefið atvinnumálanefnd sveitarfélagsins heimild til að auglýsa rekstur nýs tjaldsvæðis á Egilsstöðum, sem nú er í uppbyggingu. Þá verður jafnframt auglýst eftir áhugasömum aðilum um nýtingu og rekstur á ónýttum hluta gamla trésmíðaverkstæðis Kaupfélags Héraðsbúa sem er við hlið væntanlegs tjaldsvæðis. Þar hefur verkefnið Þorpið einmitt lýst áhuga á að fá inni fyrir verkstæði undir handverk og hönnun.
Nú stendur yfir myndlistarsýningin Ljós í myrkri í kaffihúsinu Nesbæ á Norðfirði. Þetta er fyrsta einkasýning Norðfirðingsins Brynju Garðars og eru verkin unnin með olíu, grafík og vatnslitum.
Sauðfjársæðinganámskeið verður haldið á Skjöldólfsstöðum í Jökuldal á föstudag. Námskeiðið er haldið í samstarfi við Búnaðarfélag Austurlands og er fyrir alla sauðfjárbændur og þá sem hafa áhuga á að starfa við sauðfjársæðingar. Umsjón og kennsla verður í höndum Þorsteins Ólafssonar, dýralæknis.
Hreppsnefnd Fljótsdalshrepps hefur ákveðið að ganga að tilboði Yls ehf. um jarðvinnu og uppsteypu á nýjum ferðamannaskála sveitarfélagsins í Laugarfelli og er búið að ganga frá samningi við Yl, sem var lægstbjóðandi í verkið. Samið hefur verið við Svein Þórarinsson verkfræðing á Egilsstöðum um eftirlit og verkstjórn fyrir hönd sveitarfélagsins.
Stjórn Starfsmannafélags Fjarðabyggðar lýsir undrun og hryggð yfir þeirri ákvörðun stjórnenda Fjarðabyggðar að leggja niður og loka starfstöð sveitarfélagsins að Hafnarbraut 2 í Neskaupstað og flytja starfsemina á Reyðarfjörð. Starfsmannafélagið mótmælir þeirri ákvörðun að skylda núverandi starfsmenn í Neskaupstað til að aka daglega á Reyðarfjörð um 80 km vegalengd til og frá vinnu ella hætta að öðrum kosti uni starfsmenn ekki breyttum aðstæðum.
Dagarnir 5. - 15. nóvember voru helgaðir ljósinu og myrkrinu á Austurlandi og var ýmislegt gert til að hlýja hjartanu og huganum á Héraði á þessum dögum. Menningarmiðstöð Fljótsdalshéraðs lét ekki sitt eftir liggja og skipulagði ýmislegt skemmtilegt í skammdeginu.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.