Lið sveitarfélagsins Fljótsdalshéraðs, sem náð hefur frábærum árangri í
spurningakeppninni Útsvari seinustu tvö ár, mætir Akranesi í kvöld.
Hrafnkell Lárusson, héraðsskjalavörður, hefur tekið sæti Stefáns Boga
Sveinssonar í liðinu.
Hugmyndir um að breyta frystihúsinu á Stöðvarfirði í sköpunarmiðstöð þar
sem saman kom íslenskir og erlendir listamenn voru kynntar á
borgarafundi fyrir skemmstu. Stöðin hefur sjálfbærni að leiðarljósi og gert er ráð fyrir að hún gangi fyrir eigin rafmagni.
Leikfélag Fljótsdalshéraðs frumsýnir í kvöld gamanleikritið Einn koss enn og ég segi ekki orð við Jónatan eftir Marc Camoletti sem samdi til að mynda leikritið Sex í sveit. Leikstjórar verksins segjast sjaldan hafa unnið með jafn hláturmildum hópi leikhúsfólks.
Hin árvissa Grýlugleði verður haldin á Skriðuklaustri sunnudaginn 27.
nóvember kl. 14.00. Von er á sagnaálfum og gaulálfum sem munu segja frá
og syngja um Grýlu og hyski hennar sem búið hefur um aldir í
Brandsöxlinni ofan við Víðivelli í Fljótsdal.
Fyrir stuttu kom út Náttúrumæraskrá Fljótsdalshéraðs, eftir Helga
Hallgrímsson, náttúrufræðing. Skráin er tæplega 160 blaðsíður að stærð
og er lýsing á um 600 stöðum og svæðum í sveitarfélögunum Fljótsdalshreppi og Fljótsdalshéraði, sem höfundur
telur sérstaklega athyglisverð og kallar náttúrumæri. Þeir sem áhuga
hafa geta fengið eintak af náttúrumæraskrá Helga á skrifstofum
sveitarfélagsins án endurgjalds.
Ljóðaklúbburinn Hási Kisi og fleiri ljóðskáld á og af Héraði standa fyrir ljóðaviðburðinum „Fullt hús skálda“ í Sláturhúsinu á Egilsstöðum í kvöld. Kvöldið verður óvenjulegt að því leyti að skáldin munu ekki lesa hvort á eftir öðru heldur verður þeim dreift um húsið og það er hlutverk gesta að finna og hlýða á þau hvert fyrir sig.
Hafnar eru útsendingar Stöðvar 1 um netið á slóðinni www.stod1.is og er
um samfellda opna dagskrá án endurgjalds um að ræða. Stöð 1 mun vera
fyrsta íslenska sjónvarpsstöðin sem sendir út samfellda ótruflaða
heildardagskrá í rauntíma um netið og er þessi dreifing á merki hennar
því kærkomin viðbót við núverandi dreifingu um örbylgju, adsl og
ljósleiðarakerfi Vodafone. Notendur netsins geta því notið dagskrár
Stöðvar 1 hvar sem þeir eru tengdir á landinu.
Hljómsveitin Nefndin hefur sent frá sér geisladiskinn Augnablik, sem
inniheldur lög við ljóð Hákonar Aðalsteinssonar, en Hákon hefði orðið 75
ára í sumar.
Einn fremsti píanóleikari Íslendinga, Víkingur Heiðar Ólafsson, verður
með tónleika í Kirkju- og menningarmiðstöðinni í Fjarðabyggð í dag. Þar
spilar hann verk eftir Bach, Chopin auk eigin útsetningar á íslenskum
sönglögum. Tónleikarnir hefjast klukkan 16:30.