Lundinn sestur upp í Hafnarhólmann
Lundinn er kominn til Borgarfjarðar eystra og sestur upp í Hafnarhólmann.„Hann settist upp klukkan 18:00 í gær. Það komu mjög margir lundar, við sáum einhver þúsund þarna í gær og þetta var mjög líflegt,“ segir Jón Þórðarson, fulltrúi sveitarstjóra á Borgarfirði.
Hefð er fyrir því að lundinn komi á svæðið fyrir miðjan apríl. Hann dvelur þar í um 100 daga við að koma upp ungum sínum en annars lifir hann á hafi.
Lundinn var reyndar kominn inn á fjörðinn einhverjum dögum fyrr en beið með að setjast upp í hólmann vegna veðurs. Hefð er fyrir því meðal Borgfirðinga að taka formlega á móti lundanum á sumardaginn fyrsta.