Lokahönd lögð á fullkomið námsver á Reyðarfirði
AFL Starfsgreinafélag hefur fest kaup á Búðareyri 1 á Reyðarfirði. Þar verður starfrækt námsver á vegum AFLs, Verkmenntaskóla Austurlands og Þekkingarnets Austurlands. Að auki flyst Reyðarfjarðarskrifstofa AFLs í húsið. Frágangur við neðri hæð þess er nú á lokastigi og hefst starfsemi þar í lok næstu viku.
Að sögn Sverris Mar Albertssonar, framkvæmdastjóra AFLs, er húsnæðið, sem er á tveimur hæðum og gengur undir nafninu Litli Molinn, alls 726 fermetrar. Neðri hæðin verður lögð undir námsver og þar verður aukinheldur skrifstofa AFLs og fundaraðstaða. Á efri hæð verða svo skrifstofur þegar á líður. Neðri hæðin er að verða tilbúin og fyrst verður flutt inn á hana til að byrja með. Farið verður í að hólfa efri hæð niður og innrétta á næstu vikum. Starfsemi hefst í hinu nýja húsnæði í lok næstu viku, en formleg opnun þess verður 23. janúar næstkomandi.
,,Við erum að koma upp toppaðstöðu til starfsendurhæfingar, sí- og endurmenntunar félagsmanna okkar hér á svæðinu, auk þess sem við flytjum skrifstofuna um set. Við leigjum svo afganginn af húsinu út frá okkur,“ segir Sverrir.
AFL áformar að selja gamla verkalýðshúsið við Brekkugötu á Reyðarfirði, auk eldra skrifstofuhúsnæðis við Búðareyrina.
