Vorveður á TTT móti við Eiðavatn
Æskulýðssamband kirkjunnar á Austurlandi hélt árlegt TTT-mót í Kirkjumiðstöðinni við Eiðavatn á dögunum. Mótið fór vel fram að venju að sögn sr. Erlu Bjarkar Jónsdóttur, héraðsprests á Austurlandi.
Mótið sóttu 66 börn á aldrinum tíu til tólf ára og komu þau víðs vegar að frá Austurlandi. „Mikið líf og fjör var á mótinu í vorveðri og einstakri nálægð við náttúru og fegurð Eiðavatns. Þemað í ár var Nýtum kosti okkar til góðra verka og var vísað til texta Filippíbréfsins 4.13, en þar stendur: Allt megna ég fyrir hjálp hans sem mig styrkan gerir,“ segir Erla Björk
Mótinu stýrðu þau Erla Björk Jónsdóttir héraðsprestur og Hákon Arnar Jónsson íþróttafræðingur, en hann er mikilreyndur á sviði æskulýðs- og sumarbúðastarfs kirkjunnar. „Börnin nutu sannarlega samvistarinnar við Hákon enda mikill snillingur þar á ferðinni. Prestar, leiðtogar, ungleiðtogar og þeir foreldrar sem fylgdu hópunum eftir til aðstoðar nutu samvistanna ekki síður en börnin. Mótið var því líka gefandi inn í starf Farskóla leiðtogaefna kirkjunnar en hluti af þeim ungleiðtogum sem lagt hafa stund á nám í leiðtogafræðum hér á Austurlandi fékk þar dýrmæta reynslu af störfum og ábyrgð á vettvangi,“ segir Erla Björk.
Sr. Erla Björk segir starf Æskulýðssambands kirkjunnar á Austurlandi, ÆSKA, blómstra ár frá ári. „Stjórn félagsins hefur lagt mikinn metnað í starfsemina. Mig langar að þakka það gróskumikla starf sem unnið er á vettvangi æskulýðsstarfs á Austurlandi og þau tækifæri sem unnist hafa til þess að skapa skemmtilega viðburði og eftirminnilegar samverustundir í kirkjunni okkar.“
