Þjálfarahringekja hjá Fjarðabyggð
Heimir Þorsteinsson verður þriðji maðurinn til að þjálfa karlalið Fjarðabyggðar í sumar eftir að David Hannah hætti í gær.
Hannah tók við í lok júlí af Magna Fannberg sem var rekinn. Seinasti leikur Hannah var 3-0 ósigur gegn Stjörnunni í gær. Hann samdi við Fjarðabyggð í lok maí en fékk ekki leikheimild með liðinu fyrr en 15. júlí. Honum var boðið starf í Skotlandi sem hann þáði. Elvar Jónsson, aðstoðarmaður Hannah, hættir einnig en verður áfram í stjórn félagsins. Í tilkynningu sem félagið sendi frá sér í gær segir að ljóst hafi verið að hann gæti ekki klárað tímabilið vegna annarra skuldbindinga.Heimir Þorsteinsson hefur stýrt liðinu af bekknum í seinustu tveimur leikjum. Hann þjálfaði liðið ásamt Elvar árin 2004 þegar það fór upp úr þriðju deild og festi sig í sessi í annarri deild. Markahrókurinn reynslumikli, Vilberg Marinó Jónasson, verður aðstoðarmaður Heimis.
Höttur tapaði í gær heima 0-1 fyrir Gróttu. Markið kom skömmu fyrir leikslok úr vítaspyrnu.
Kvennalið Hattar tapaði fyrri leik sínum gegn ÍR í undanúrslitum 1. deildar kvenna 0-3 á Vilhjálmsvelli í gær. Markalaust var í hálfleik.
Spyrnir og Dalvík/Reynir gerðu 2-2 jafntefli í lokaleik D riðils þriðju deildar karla. Úrslitakeppni deildarinnar hófst í gær. Huginn gerði 1-1 jafntefli við Skallagrím á Seyðisfirði og Sindri 2-2 jafntefli við KV á KR-vellinum. Seinni leikirnir fara fram á þriðjudag.
