Forskráning fyrir Austfirðinga á LungA
Austfirsk ungmenni hafa tækifæri til fimmtudags til að skrá sig á listasmiðjur LungA-hátíðarinnar sem haldin verður á Seyðisfirði í júlí. Skipuleggjendur segjast vilja ná betur til nærsamfélagsins að þessu sinni. Hægt er að skrá börn frá fjögurra ára aldri í listasmiðjur.„Meiningin er að gæta að grunnhugmyndum hátíðarinnar, að skapa vettvang þar sem austfirskum ungmennum býðst tækifæri til að taka þátt í skapandi verkefnum, myndlist og listrænni tjáningu eins og nafnið: LungA – Listahátíð ungs fólks á Austurlandi, ber með sér,“ segir Halldóra Kristín Lárusdóttir, samfélagsfulltrúi LungA.
Hátíðin verður haldin á Seyðisfirði í 24. sinn dagana 9. – 16. júlí í sumar. Í dag hófst forskráning í listasmiðjur fyrir austfirsk börn og ungmenni. Hún stendur til fimmtudags. Auk forskráningarinnar fá Austfirðingar afslátt á þátttökugjaldi og nemendur Menntaskólans á Egilsstöðum og Verkmenntaskóla Austurlands geta fengið tvær einingar.
Skráningin er opin börnum frá 4 ára aldri. Halldóra segir að til standi að gera sérstakar aldursflokkaskiptar smiðjur fyrir börn 4-16 ára en einstaklingum eldri en 16 ára geta skráð sig í almennar listasmiðjur á sama hátt.
Halldóra segir ýmsar ástæður fyrir að ákveðið sé að bjóða Austfirðingum sérkjör í ár. Til að mynda sé ekki sérstakt erlent samstarf í kringum hátíðina nú, sem síðustu ár hafi skilað um 60 þátttakendum í hvert sinn. Þar með skapist rými til sem skipuleggjendur hafi viljað bjóða nærsamfélaginu. „Okkur langar að LungA sé staður þar sem samfélagið á Austurlandi geti komið saman og kynnst framúrstefnu í myndlist og tónlist.“
Fylla þarf út sérstakt skráningarblað sem aðgengilegt er hér. Það er jafnframt könnun á áhugasviðum og hugmyndum væntanlegra þátttakenda um hvers konar smiðjum þá langi helst að taka þátt í. Svörin nýtast síðan til að móta vinnusmiðjurnar.
