Fjórhjólið seldist upp á Seyðisfirði
Síðasti dagur flugeldasölu og þar sem almenningur hefur leyfi til að skjóta upp flugeldum er í dag. Á Seyðisfirði hefur verið ágætis sala því heimafólk vill styðja við bakið á björgunarsveitinni Ísólfi.„90% sölunnar er um áramótin, mest á gamlársdag. Á þrettándanum kemur fólk og kaupir eina litla tertu og bætir við stjörnuljósi fyrir börnin,“ segir Haraldur Björn Halldórsson sem var á vakt í flugeldasölu Ísólfs þegar Austurfrétt átti þar leið um í dag.
Hann segir Seyðfirðinga duglega í flugeldakaupum. „Mín tilfinning er að það sé skotið upp í að minnsta kosti öðru hverju húsi á gamlárskvöld. Ég held fólk hugsi flugeldana sem stuðning við björgunarsveitina frekar en að það sé svo skotglatt.
Það fannst í fyrra að það var ekki sama stemming eftir skriðuföllin. Hávaðinn kann að vekja upp ónot. Fjörðurinn er svo lokaður að sprengingarnar glymja í fjöllunum þótt mér finnist það skemmtilegt því það eykur á áhrifin. Eftir það hefur fólk fært sig meira yfir í friðarkerti og rótarskot því það vill styrkja sveitina.“
Haraldur segir minna skotið upp á þrettándanum og til að mynda er engin flugeldasýning á Seyðisfirði í dag. „Þetta eru restarnar, fjölskyldufólkið er að klára úr sínum pökkum. Við vonumst til að koma sem mestu út því við þurfum að taka flugeldana úr hillunum og koma þeim annað í geymslu.“
Að þessu sinni bættist í úrval flugeldanna tertur sem nefndar eru eftir tækjum á borð við fjórhjól en sú terta seldist afar vel á Seyðisfirði. „Þetta eru metnaðarfullir pakkar, fjórhjólið var með 90 skotum á 53 sekúndum þannig það var mikið að gerast. Við skutum henni sjálfir upp því við vildum vita hvað við værum með í höndunum. Þá fór fólk að koma og sagðist vilja fá eina svona,“ segir Haraldur en fjórhjólið var uppselt seinni partinn í dag.
Annars eru minni tertur vinsælasta varan. „Þetta eru tertur á borð við Sturlu Þórðarson og Þórð mostraskegg. Þetta eru svokallaðir blævængir sem fara upp til hliðanna. Með þessum tertum fær fólk mikið fyrir peninginn.“
