Sverrir og Sigríður fljótust í Urriðavatnssundi
Íþróttir • This email address is being protected from spambots. You need JavaScript enabled to view it. • Fyrst birt 31. júl 2019 13:50 • Uppfært 31. júl 2019 13:51
Sverrir Jónsson og Sigríður Lára Guðmundsdóttir komu fyrst í mark í Urriðavatnssundinu sem synt var síðasta sunnudag. Sverrir synti 2,5 km sundið á tímanum 36:54,63 mín., og var þremur mínútum á undan næsta manni. Sigríður Lára varð fyrst í kvennaflokki á tímanum 42:27,97 mín.
Kjöraðstæður voru til sundsins, skýjað, hlýtt og lítill vindur sem þýddi að nær engar öldur voru í vatninu, en þær gera sundfólki erfitt fyrir.
Metþátttaka var að þessu sinni en 233 keppendur fóru út í vatnið í 2,5 km sundið. Af þeim luku 225 sundinu. Elsti þátttakandinn var 75 ára.
Auk 2,5 km sundsins var um helgina þreytt í fyrsta sinn 500 metra ungmenna- og skemmtisund sem tólf manns voru skráðir í. Þá var nóg að gera við Urriðavatn á laugardaginn þar sem Vök baths opnaði fyrir almenning á sama tíma og sundið fór fram.
