Höttur í úrvalsdeildina í körfubolta á ný
Körfuknattleikslið Hattar frá Egilsstöðum mun spila gegn þeim allra bestu á næstu leiktíð eftir að körfuknattleiksfélagið lagði lið Álftaness í kvöld með 99 stigum gegn 70 stigum Álftnesinga.
Þörf var á þremur sigrum til að tryggja liðinu sæti í Subway-deildinni á næstu leiktíð og leikmenn Hattar gerðu það sem þurfti til í kvöld. Sigurinn verðskuldaður og aldrei alvarlega í hættu en liðið frá Egilsstöðum leiddi alla fjóra leikhlutana. Þetta var þriðji sigur Hattar á liði Álftaness í baráttunni um laust sæti í úrvalsdeildinni í körfuknattleik og meira þarf ekki til að komast í úrvalsdeildina.
David Guardia Ramos frá Spáni átti stórleik og negldi 21 stig í leik kvöldsins fyrir Hött í viðbót við fjögur fráköst. Annar Spánverji, Juan Luis Navarrro, átti líka fínan leik og endaði með fimm stig, tólf fráköst og fimm stoðsendingar.
