Fótbolti: Höttur/Huginn úr leik í bikarnum
Íþróttir • This email address is being protected from spambots. You need JavaScript enabled to view it. • Fyrst birt 25. maí 2022 11:41 • Uppfært 25. maí 2022 11:42
Höttur/Huginn er úr leik í bikarkeppni karla í knattspyrnu eftir 1-3 tap fyrir Ægi úr Þorlákshöfn í 32ja liða úrslitum keppninnar á Fellavelli í gærkvöldi.
Höttur/Huginn komst yfir strax á níundu mínútu þegar Rafael skoraði úr víti. Gestirnir jöfnuðu eftir rúman hálftíma og komust yfir snemma í seinni hálfleik. Föst leikatriði reyndust varnarmönnum Hattar/Hugins erfið eins og stundum fyrr.
Höttur fékk fín færi til að jafna og minnst í tvífang varði markvörður Ægis frábærlega. Þriðja mark gestanna kom svo fjórum mínútum fyrir leikslok.
Á mánudagskvöld vann BN Mána 5-2 í fjórðu deild karla á Norðfjarðarvelli. Dagur Þór Hjartarson kom BN yfir strax á þriðju mínútu, Filip Sakaluk skoraði annað á 33. mínútu og loks Víkingur Pálmason það þriðja eftir kortér í seinni hálfleik.
Fjögur mörk, tvö frá hvoru liði komu á 11 mínútna kafla í seinni hálfleik. Hákon Jónsson skoraði fyrst fyrir BN á 70. mínútu en Ingi Þór Sigurðsson setti tvö fyrir gestina áður en Filip Sakaluk skoraði fimmta mark BN og það síðasta í leiknum. Er þetta fyrsti sigur í sögu BN í Íslandsmóti.
Austfirsku kvennaliðin spila bæði á morgun. Einherji fær Gróttu í heimsókn meðan Fjarðabyggð/Höttur/Leiknir heimsækir Grindavík.
