Skip to main content

Fótbolti: Einherji vann fjórðu deildina

Íþróttir • This email address is being protected from spambots. You need JavaScript enabled to view it. • Fyrst birt 19. sep 2022 07:31 • Uppfært 19. sep 2022 07:33

Einherji er deildarmeistari í fjórðu deild karla eftir 2-1 sigur á Árbæ í úrslitaleik um helgina. Linli Tu, leikmaður Fjarðabyggðar/Hattar/Leiknis varð markadrottning Lengjudeildar kvenna.


Fimm af sex austfirskum knattspyrnuliðum luku leiktíð sinni um helgina en aðeins Einherji í annarri deild kvenna á leik um næstu helgi.

Karlaliðið tryggði sér deildarmeistaratitilinn í fjórðu deild á laugardag eftir 2-1 sigur á Árbæ í úrslitaleik sem leikinn var á Sauðárkróki. Maxim Iurcu kom Einherja yfir á 34. mínútu en Serghei Diulgher fékk rautt spjald á 48. mínútu og tíu mínútum fyrir leikslok jafnaði Árbæ. Það var hins vegar Carlos Javier sem tryggði Einherja sigur á 95. mínútu með skoti lengst utan af velli.

Fjarðabyggð/Höttur/Leiknir lauk tímabilinu á jafntefli við HK á útivelli á föstudagskvöld. Linli Tu kom FHL yfir á 51. mínútu. Hún skoraði sextán mörk í sumar og varð markahæst í deildinni. Halldóra Birta Sigfúsdóttir fékk hins vegar sitt annað gula spjald þremur mínútum síðra og HK jafnaði á fjórðu mínútu uppbótartíma. Austfjarðaliðið endaði í fimmta sæti deildarinnar, sem verður að teljast fínn árangur miðað við að liðið var nýtt í deildinni.

Höttur/Huginn endaði líka í fimmta sæti annarrar deildar karla en liðið var líka nýtt í þeirri deild. Síðasti leikurinn var 3-2 sigur gegn Fjallabyggð á heimavelli. Björgvin Stefán Pétursson kom Hetti/Huginn yfir á 10. mínútu en gestirnir jöfnuðu fjórum mínútum síðar. Matheus skoraði á annarri mínútu seinni hálfleiks áður en Björgvin Stefán bætti við öðru marki sínu á 56. mínútu. Gestirnir minnkuðu muninn um miðjan seinni hálfleik.

Fyrir leikinn skrifaði Brynjar Árnason undir samning um að þjálfa Hattar/Hugins liðið áfram en hann var að ljúka sínu öðru sumri með það.

Það var frábær seinni helmingur móts sem skilaði Hetti/Huginn upp í miðja deild. Á sama tíma hefur ekkert gengið upp hjá Knattspyrnufélagi Austfjarða. Liðið tapaði síðasta leiknum í Sandgerði gegn Reyni á laugardag, 2-0 og endaði í 10. sæti, tveimur stigum fyrir ofan fallliðin Reyni og Magna. Mörkin komu rétt fyrri og eftir leikhlé.

Tíðindaverðast úr leiknum var trúlega að leikurinn var leikinn klukkan átta um kvöldið, sex tímum á eftir áætlun þar sem morgunflugi frá Egilsstöðum var fellt niður.

Múlaþing - Facebook 3
Brúnás

Síðustu fréttir