Birna Jóna á Ólympíuhátíð Evrópuæskunnar
Íþróttir • This email address is being protected from spambots. You need JavaScript enabled to view it. • Fyrst birt 20. júl 2022 08:15 • Uppfært 20. júl 2022 18:48
Birna Jóna Sverrisdóttir, frjálsíþróttakona úr Hetti, hefur verið valin sem einn af þátttakendum Íslands á Ólympíuhátíð Evrópuæskunnar sem haldnir verða í Slóvakíu í næstu viku.
Ísland sendir þátttakendur í badmintoni, fimleikum, frjálsíþróttum, hjólreiðum, sundi, handbolta, júdó og tennis á leikana sem fara fram í Banská Bystrica í Slóvakíu 24. - 30. júlí.
Birna Jóna er einn fjögurra keppenda Íslands í frjálsíþróttum en hún keppir í sleggjukasti.
Birna Jóna, sem er fimmtán ára gömul, kastaði 51,65 metra með 3 kg sleggju á vormóti ÍR í lok maí og 41,06 metra með 4 kg sleggju á Meistaramóti Íslands fyrir um mánuði.
Þetta er hennar besti árangur á ferlinum með hvorri sleggju en hún á að baki Íslandsmet í greininni í yngri aldursflokkum.
Mynd: Frjálsíþróttasamband Íslands
