Sumarhátíð UÍA og Síldarvinnslunnar um helgina
Íþróttir • This email address is being protected from spambots. You need JavaScript enabled to view it. • Fyrst birt 09. júl 2013 23:15 • Uppfært 09. júl 2013 23:15
Sumarhátíð UÍA og Síldarvinnslunnar verður haldin á Egilsstöðum um helgina. Hátíðin er stærsta einstaka verkefni Ungmenna- og íþróttasambands Austurlands á hverju ári.
Keppnin byrjar á föstudagskvöld á keppni í borðtennis og Eskjumótinu í sundi. Á laugardegi lýkur keppni í sundi en þá hefst keppi á Nettómótinu í frjálsíþróttum á Vilhjálmsvelli.
Frjálsíþróttakeppnin er aðalkeppni mótsins en búist er við um 200 keppendum. Keppnin er héraðsmót Austfirðinga en hana hafa gjarnan sótt nágrannar úr norðri og suðri.
Á sunnudag heldur frjálsíþróttakeppnin áfram en eftir hádegið verður keppt í boccia og strandblaki. Þá munu félagar úr Skotfélagi Austurlands (SKAUST) sýna bogfimi og úthlutað verður styrkjum úr Spretti, afrekssjóði UÍA og Alcoa.
Nánari dagskrá og upplýsingar um hátíðina má finna á www.uia.is.
