Spilaði sigurleikinn gegn FSu handarbrotinn
Íþróttir • This email address is being protected from spambots. You need JavaScript enabled to view it. • Fyrst birt 10. mar 2015 17:11 • Uppfært 10. mar 2015 17:13
Nökkvi Jarl Óskarsson, leikmaður körfuknattleiksliðs Hattar, lét handarbrot ekki aftra sér frá því að spila gegn FSu á föstudag þegar Höttur tryggði sér sæti í úrvalsdeild karla. Hann losnaði úr gifsi tveimur dögum fyrir leik.
„Mér er alveg sama um þetta brot. Það kom aldrei til greina að hvíla," sagði Nökkvi Jarl í samtali við Austurfrétt eftir leikinn.
Nökkvi Jarl spilaði í 24 mínútur, hirti fimm fráköst og stal þremur boltum auk þess að setja niður eitt þriggja stiga skot.
„Þetta er án efa skemmtilegasti leikur sem ég hef spilað á ferlinum og sömuleiðis besta stúka sem ég hef haft."
Að auki náði hann sér í fjórar villur. Ein var sérlega klaufaleg en sex sekúndum fyrir leikslok braut hann á leikmanni FSu á leið í vonlítið langskot og fékk sá þrjú víti sem hann raðaði ofan í.
Það skipti samt engu máli. „Þetta var adrenalínið. Ég hef aldrei fengið jafn mikið af því."
Mynd: Sigrún Júnía Magnúsdóttir
