Opið Austurlandsmót í Bogfimi
Íþróttir • This email address is being protected from spambots. You need JavaScript enabled to view it. • Fyrst birt 16. maí 2014 15:07 • Uppfært 16. maí 2014 15:08
Fyrsta opna Austurlandsmótið í bogfimi verður haldið í Fjarðabyggðarhöllinni á Reyðarfirði á morgun. Skipuleggjendur mótsins segja markmiðið að byggja upp mót á alþjóðavísu.
Bogfimi nýtur vaxandi vinsælda á Austurlandi jafnt sem Íslandi. Rúmt ár er síðan byrjað var að stunda greinina á vegum Skotfélags Austurlands (SKAUST) og í kjölfarið fylgdi Skotfélagið Dreki. Félögin standa saman að mótinu á morgun.
„Við viljum koma á stórmóti sem haldið verður á hverju ári,“ segir Bastian Stange hjá Skotfélaginu Dreka. „Markmiðið er ekki bara að laða til okkar íslenska keppendur heldur einnig erlendis frá. Það er markmið okkar í framtíðinni.“
Til leiks á morgun eru skráðir 22 íslenskir bogfimimenn. „Við erum stolt af því að halda þetta mót og hlökkum þegar til þess næsta.“
Mótið á morgun hefst klukkan 12:00 á hádegi og gert er ráð fyrir að það taki um fjóra tíma.
