Boltaleikjum helgarinnar frestað: Ístöltið og Hennýjarmót á áætlun
Íþróttir • This email address is being protected from spambots. You need JavaScript enabled to view it. • Fyrst birt 28. feb 2014 14:10 • Uppfært 28. feb 2014 14:42
Búið er að fresta leik Hattar og Þórs frá Akureyri í 1. deild karla í körfuknattleik sem fram átti að fara á Egilsstöðum í kvöld. Einnig er óvíst um fjóra leiki Þróttar og KA í blaki karla og kvenna sem fram áttu að fara í dag og á morgun.
Ástæða frestunarinnar er ófærð á leiðinni milli Akureyrar og Egilsstaða. Kanna á hvort unnt verður að opna leiðina á morgun. Ef svo verður mun hugsanlega verða leikið í blakinu um helgina.
Samkvæmt upplýsingum frá Hetti er verið að skoða að færa leikinn gegn Þór yfir á mánudag en ekkert hefur verið staðfest í þeim efnum.
Ekki setur veðrið þó alla íþróttaviðburði helgarinnar í uppnám.
Ístölt hestamannafélagsins Freyfaxa mun fara fram á Eiðavatni og hefst klukkan 10 á morgun, laugardag. Ísinn þar er 45 sentímetra þykkur og því vel öruggur. Nánari upplýsingar um dagskrá og staðsetningu má nálgast á www.freyfaxi.org.
Á Eskifirði verður haldið Hennýjarmót í sundi á vegum sunddeildar Austra. Mótið hefst klukkan 10:00 á morgun en upphitun í lauginni klukkustund fyrr.
