Landsbanki Íslands hefur ákveðið að loka útibúum sínum á Eskifirði og Fáskrúðsfirði í umfangsmiklum hagræðingaraðgerðum sem ná til starfsemi bankans um allt land. Formaður bæjarráðs Fjarðabyggðar hvetur bæjarbúa til að láta bankann finna fyrir afleiðingum gerða sinna með að flytja viðskipti sín til Sparisjóðs Norðfjarðar.
Bæjarstjórn Fljótsdalshéraðs samþykkti í gær að sveitarfélagið yrði aðili að GáF ehf. sem undirbýr kaup á Grímsstöðum á Fjöllum með það að augum að leigja það til kínverska fjárfestisins Huang Nubo. Einu atkvæði munaði í atkvæðagreiðslu þar sem minnihlutinn greiddi atkvæði gegn tillögunni. Hann gagnrýnir hraða vinnunnar og skort á upplýsingum. Fulltrúar meirihlutans segja lykilatriði að vera með til að hafa greiðan aðgang að upplýsingum.
Útskriftarnemar úr Menntaskólanum á Egilsstöðum og Verkmenntaskóla Austurlands spjara sig vel þegar komið er í háskólanám. ME er í fimmta sæti nýrrar könnunar tímaritsins Frjálsrar verslunar yfir bestu framhaldsskóla landsins.
Bæjarbúar á Seyðisfirði hafa boðað til samstöðu- og hugmyndafundar í félagsheimilinu Herðubreið annað kvöld eftir að veitingastaðurinn Kaffi Lára brann í gærkvöldi.
Þóroddur Helgason Seljan, fræðslustjóri Fjarðabyggðar og fyrrverandi skólastjóri Grunnskóla Reyðarfjarðar, hlaut Dugnaðarforksverðlaun Heimilis og skóla í dag. Verðlaunin voru afhent við hátíðlega athöfn í Þjóðmenningarhúsinu.
Samkvæmt útreikningum Agl.is er íbúafjölgun á mið-Austurlandi frá upphafi stóriðjuframkvæmda aðeins um þúsund manns. Því er haldið fram í niðurstöðum sjálfbærniverkefnis fyrir Austurland að fjölgunin hafi verið tvö þúsund. Mistök virðast hafa orðið við gagnaútreikning á íbúum í Fjarðabyggð.
Hugmynd að viskíframleiðslu og byggingu verksmiðju til hennar á Austurlandi þótti besta viðskiptahugmyndin á Atvinnu- og nýsköpunarhelginni sem fram fór helgina 11. – 13. maí í Fjarðabyggð. Hugmyndin er hugarfóstur Gillian ‘Dillý’ Haworth. Stofnun fiskisafns á Breiðdalsvík þótti næst besta hugmyndin.
Bæjarráð Fjarðabyggðar kemur ekki fjárhagslega að auglýsingum sem birtar hafa verið undanfarna daga þar sem fyrirhugaðar breytingar á fiskveiðistjórnunarkerfinu eru gagnrýnar. Ráðið styður þær hins vegar efnislega.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.