Konur eru nú í fyrsta sinn í meirihluta í hafnarstjórn Fjarðabyggðar. Í kjölfar brotthvarfs Eiðs Ragnarssonar úr bæjarstjórn Fjarðabyggðar tók Pálína Margeirsdóttir sæti hans í hafnarstjórn og því eru nú þrjár konur í hópi fimm stjórnarmanna.
Forstjóri RARIK telur að mikill árangur hafi náðst í jöfnun aðstöðumunar dreifbýlis og þéttbýlis með samþykkt nýrra laga um jöfnun flutningskostnaðar raforku í vor. Formaður bæjarráðs Fljótsdalshéraðs segir erfitt hafa verið að sitja undir þeirri mismunun sem var.
LungA-skólinn á Seyðisfirði hefur göngu sína á ný í september, en skólinn hefur starfað í einn heilan vetur. Námsfyrirkomulaginu svipar til norrænna lýðháskóla og er boðið upp á 12 vikna námskeið, bæði á haustönn og vorönn. Austurfrétt heyrði í Jonatan Spejlborg, einum aðstandenda skólans og spurði hann út í veturinn framundan.
Snæfellsvegur inn að Snæfellsskála opnaði loks fyrir akandi umferð þann 29. júlí síðastliðinn. Það er umtalsvert seinna en fyrri ár og má rekja orsökina til mikillar kuldatíðar undanfarna mánuði. „Þetta er held ég bara seinasta opnunin í manna minnum. Það var búið að vera svo mikið af snjó og aurbleytu að það var ekkert hægt að keyra hingað áður,“ segir Pétur Halldórsson, landvörður í Snæfellsskála í samtali við Austurfrétt.
Mikið flóð varð að Skriðufelli í Jökulsárhlíð í vikunni, í kjölfar mikillar úrkomu. Túnin voru undirlögð vatni eins og sjá má í myndbandinu hér að neðan, sem var tekið af Stefaníu Malen Stefánsdóttur á Skriðufelli.
Utanríkismálanefnd Alþingis virðist ekki vera á þeirri skoðun að hverfa frá viðskiptaþvingunum gegn Rússum í ótta við að það komi niður á íslenskum sjávarútvegsfyrirtækjum. Formaður Samtaka fyrirtækja í sjávarútvegi segir viðskiptabann ekki uppbyggilega leið til að leysa ágreiningsmál.
Reyðfirðingurinn Aron Leví Beck vinnur þessa dagana að rannsókn, þar sem forsendur fyrir því að starfrækja svokallað sameldi (e. aquaphonics) við hlið sundlauga á Íslandi eru kannaðar. Aron Leví er byggingafræðingur og meistaranemi í skipulagsfræði við Landbúnaðarháskóla Íslands. Hann leysti af hjá hitaveitunni í Fjarðabyggð síðastliðið sumar.
Óvíst að nokkuð verði úr framkvæmdum við Helgustaðanámu í sumar eftir að eina tilboðinu sem barst í þær var hafnað. Náman er á rauðum lista Umhverfisstofnunar þar sem hæpið þyki að hún geti tekið við þeim fjölda ferðamanna sem hana sækir.
Vegurinn frá Borgarfirði yfir í Loðmundarfjörð varð fyrir skemmdum vegna þeirrar gríðarlegu úrkomu sem var á Austfjörðum í fyrrinótt og í gær. Unnið er að viðgerð og reiknað er með því að vegurinn verði orðinn fær í kvöld, samkvæmt Birni Sigurðssyni hjá Vegagerðinni.