Stjórnendur Grunnskóla Reyðarfjarðar hafna því að þeir hafi ekki framfylgt fyrirmælum frá fræðslunefnd Fjarðabyggðar frá í haust um að undirbúa akstur grunnskólabarna í skólasund í nágrannabyggðum. Þeir hafi brugðist við um leið og ljóst varð að ekki yrði hægt að kenna sund á Reyðarfirði í vor.
Hjón á Egilsstöðum eru í heimasóttkví eftir að hafa komið heim frá einu þeirra héraða á Ítalíu þar sem kórónaveiran hefur breiðst út. Ekki er grunur um að Héraðsbúarnir séu smitaðir.
Bæjarstjórn Fjarðabyggðar samþykkti á fundi sínum á fimmtudag að skoða málefni sundlaugarinnar á Reyðarfirði heildstætt í tengslum við frekari uppbyggingu íþróttamannvirkja á staðnum. Á meðan þarf að keyra skólabörnum annað í sundkennslu. Foreldrar á Reyðarfirði mótmæla þeirri ráðstöfun og bæjarfulltrúar minnihlutans gagnrýna meirihlutann fyrir seinagang í málinu.
Svandís Svavarsdóttir, heilbrigðisráðherra, er ánægð með samstarfssamning um innleiðingu jákvæðrar heilsu sem Heilbrigðisstofnun Austurlands verður fyrst íslenskra heilbrigðisstofnana til að innleiða. Fulltrúar HSA, þriggja sveitarfélaga á Austurlandi og Institute for Positive Health skrifuðu undir samstarfssamning þess efnis í heilbrigðisráðuneytinu í dag.
Ekki er talin hætta á að einstaklingar án einkenna kórónaveiru geti smitað aðra. Þess vegna sé ekki undarlegt að setja fólk í heimasóttkví þótt það hafi farið í gegnum nokkra viðkomustaði á leið heim til sín af svæði þar sem veiran hefur breiðst út. Leitað er að samferðafólki hjóna frá Egilsstöðum sem sett voru í heimasóttkví í gær.
Félagar í Félagi opinberra starfsmanna á Austurlandi (FOSA) hafa samþykkt þátttöku í verkfallsaðgerðum BSRB sem starfa hjá sveitarfélögum víða um land. Verkfallið hefst mánudaginn 9. mars hafi ekki samist fyrir þann tíma.
Heilbrigðisstofnun Austurlands (HSA) verður fyrst íslenskra heilbrigðisstofnana til að innleiða hollenska hugmyndafræði um jákvæða heilsu. Skrifað var undir samninga þess efnis milli HSA, þriggja austfirskra sveitarfélaga og Instittute for Positive Health í dag.
Nemendur í Nesskóla í Neskaupstað hafa ekki enn farið af stað í bæinn til að halda upp á öskudag vegna vonds veðurs. Færð á og í kringum Egilsstaði er slæm.
Hafrannsóknastofnun telur að loðnuganga, sem sást skammt undan Papey á sunnudag, hafi verið mæld fyrr í mánuðinum í skipulögðum leitarleiðangri. Áfram verður fylgst með stöðunni á miðunum.
Framkvæmdastjóri Institute for Positive Health (IPH) í Hollandi segist vona að innleiðin hugmyndafræði stofnunarinnar um jákvæða heilsu hjá Heilbrigðisstofnun Austurlands (HSA) eigi eftir að ganga vel og verða öðrum íslenskum heilbrigðisstofnunum til eftirbreytni. Um leið efli hún samstarf Íslands og Hollands í heilbrigðismálum.
Framkvæmdastjóri Síldarvinnslunnar í Neskaupstað, segir það áfall ef ekki verður hægt að veiða loðnu í íslenskri lögsögu annað árið í röð. Mikilvægt sé að halda áfram að fylgjast með loðnugöngum þótt ekki sé útlit fyrir að gefinn verði út veiðikvóti á þessari vertíð.