Von á ítölskum orrustuþotum
Búast má við á að friðurinn yfir Egilsstöðum verði rofinn síðar í vikunni þegar ítalskar orrustuflugvélar verða þar við æfingar.Samkvæmt tilkynningu frá Landhelgisgæslunni er loftrýmisgæsla Atlantshafsbandalagsins við Ísland að hefjast á ný með komu sveitar frá ítalska flughernum.
Alls munu allt að 140 liðsmenn ítalska flughersins taka þátt í verkefninu ásamt starfsmönnum frá stjórnstöð NATO í Uedem, Þýskalandi. Flugsveitin kemur til landsins með fjórar Eurofighter Typhoon EF-2000 orrustuþotur.
Í tengslum við þetta er gert ráð fyrir aðflugsæfingum að flugvellinum á Egilsstöðum fimmtudag eða föstudag.
Verkefnið er framkvæmt með sama fyrirkomulagi og fyrri ár og í samræmi við loftrýmisgæsluáætlun NATO fyrir Ísland. Flugsveitin verður staðsett á öryggissvæðinu á Keflavíkurflugvelli. Ráðgert er að verkefninu ljúki um miðjan apríl.
