Virðingarvika í ME: Læra um taubleyjur og plastlausar blæðingar

Þessi vika er tileinkuð virðingu í Menntaskólanum á Egilsstöðum.  „Megin inntakið er að nemendur átti sig á því að við höfum öll áhrif og við skiptum öll máli. Virðing er ákveðið leiðarstef í því,“  segir Hildur Bergsdóttir, félagsráðgjafi hjá nemendaþjónustu ME.

Hildur segir virðingu eina af þremur gildum sem skólinn starfar eftir og ákveðið hafi verið að tileinka eina viku í vetur hverju gildi. „Gildin eru valin í samstarfi nemenda og starfsfólks, virðing er eitt af þessum gildum ásamt jafnrétti og gleði. Við ákváðum til að gera þessum gildum hátt undir höfði og gera þau sýnilegri í skóastarfinu með því að tileinka eina viku hverju gildi, nú er virðingarvika en eftir áramót verða gleðivika og jafnréttisvika.“

Hildur segir gildin alltaf vera höfð að leiðarljósi í skólastarfinu og í þessum sértöku þemavikum verði þeim lyft meira upp og þau gerð sýnilegri. „Í þessari viku erum við aðallega að leggja áherslu á virðingu fyrir sjálfum sér, virðingu fyrir öðrum og virðingu fyrir umhverfinu. Við höfum verið með ýmsa viðburði útfrá þessum þemum.“

Formleg dagskrá virðingarviku er nokkuð þétt með í það minnsta einum stórum viðburði á dag. „Á mánudag kom Unnar Erlingsson til okkar og setti vikunna og við fengum fyrirlestur frá ungum umhverfissinnum. Á þriðjudag kom Beggi Ólafs sem er fyrirlesari og þjálfunar sálfræðingur, hann er mjög fyrirferðarmikill a samfélagsmiðlum. Á þriðjudag var líka alþjóðadagur gegn sjálfsvígum, þá klæddumst við gulu sem stendur fyrir ljósið í myrkrinu. 

Í gær var hinseginfélag ME, kindsegin, með spurningakeppni. Kindsegin er regnbogafélag fyrir nemendur sem skilgreina sig undir 78 regnboganum. Í gær fórum við líka og týndum rusl í umhverfi skólans. Í dag verðum við með spjall um umhverfismál auk plöntu- og afleggjaraskipta. Að lokum verður á morgun fyrirlestur um umhverfisvænar blæðingar, þar sem er verið að kynna ýmsar umhverfisvænar leiðir,“ segir Hildur. 

En virðingarvikan felst ekki engöngu í þessari formlegu dagskrá. „Svo er allt mögulegt annað búið að vera í gangi. Ég veit að kennararnir hafa verið að flétta þetta inní kennslu. Þau voru tildæmis að læra um taubleyjur í uppeldisfræði og æfa sig á dúkkum og böngsum. Svo erum við að leggja áherslu á að fólk komi gangandi í skólann eða noti umhverfisvæna samgöngumáta og drekki vatn úr fjölnota brúsum. Við viljum líka benda nemendum á að gos- og orkudrykkirnir sem mörg þeirra neyta í miklu mæli eru ekki í umhverfisvænum umbúðum.“

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.