Vinnsla hafin í frystihúsi SVN á Seyðisfirði

Í morgun hófst vinnsla í frystihúsi Síldarvinnslunnar (SVN) á Seyðisfirði en hún féll niður þegar stóra skriðan féll þar 18. desember sl.

Fjallað er um málið á vefsíðu SVN þar sem rætt er við Ómar Bogason hjá frystihúsinu. „Jú, það má með sanni segja að fólk er afskaplega ánægt með að lífið sé aftur að færast í fyrra horf," segir Ómar.

"Við fengum heitt vatn frá fjarvarmaveitunni í húsið í gær og þá var hafist handa við að þrífa og allt var gert spikk og span. Gullver NS kom síðan í morgun með tæp 100 tonn af blönduðum afla þannig að ekki skortir hráefnið."

Fram kemur í máli Ómars að nú landar Gullver við fiskvinnslubryggjuna en síðast þurfti hann að landa við Strandarbakka vegna þess að ekki var fært í gegnum skriðuna.

"Fyrstu dagana verður starfsfólkið flutt með rútu í gegnum skriðusvæðið að frystihúsinu, en reynt er að takmarka umferðina þar sem mest vegna þess að unnið er að því að breikka veginn í gegn og hreinsa svæðið,“ segir Ómar.

Mynd: Ómar Bogason.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.