Vilja aðgerðir Fjarðabyggðar vegna Melbæjar á Eskifirði

„Okkur hefur þótt gott að vera í Melbæ og að við viljum vera þar áfram ef gerðar væru lagfæringar sem þarf til að húsnæðið væri í góðu lagi fyrir okkur.“

Svo segir meðal annars í nýlegri áskorun stjórnar Eldriborgarafélags Eskifjarðar til bæjarstjórnar Fjarðabyggðar en húsakostur félagsins, Melbær, er orðið svo bágborinn að það er nánast orðið ónothæft undir starfsemi félagsins og jafnvel hætta á að starfsemin lognist útaf verði ekkert að gert. Kallað er eftir aðgerðum bæjarstjórnar Fjarðabyggðar sem fyrst.

Félagið ítrekar í bréfi til Fjarðabyggðar að brýnt sé orðið að finna lausn en félagið hefur margoft áður óskað aðstoðar bæjarfélagsins vegna þessa en án árangurs.

Í Melbæ hefur verið starfsemi síðan 1969 en viðhaldi var löngum ábótavant og nú telur Eldriborgarafélagið að til þurfi 20 til 30 milljónir króna til endurbóta til að koma húsnæðinu í viðunandi horf. Það sé engu að síður mun lægri upphæð en þurfi til lagfæringa á skrifstofu Hraðfrystihússins en sú hugmynd var viðruð af hálfu bæjarstjórnar fyrir nokkru sem kjörið félagsheimili fyrir félagið. Töluverðar viðgerðir þurfa þó að fara fram á því húsnæði og metur Eldriborgarafélagið að sá kostnaður sé vart undir 80 milljónum króna eða rúmlega þrefalt dýrari kostur en endurbætur á Melbæ. Þá hefur bæjarfélagið einnig bent á Valhöll sem hugsanlegan kost undir starfsemi Eldriborgarafélagsins en félagsmönnum hugnast það illa. Félagsmenn vilji vera áfram í Melbæ.

Eldri borgarar á Eskifirði hafa um rúmlega tíu ára skeið óskað aðstoðar Fjarðabyggðar vegna viðhalds á Melbæ en lítið þokast.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.